Togdheer News » Ganacsiga iyo Xiisaha Todobaadka

Dhacdo Naxdin Leh: Ilmo Yar oo ku Dhex Dhintay Baabuur Waalidkii ku Illaaway

kayse — Mon, 10 Jun 2013 19:33:08 +0000

Wiil yar oo 3 jir ah, una dhashay dalka Yemen ayaa ku geeriyooday magaalada Ras Al Khaimah ee waddanka Imaraadka Carabta, kadib markii waalidkii gaadhi kaga dhex tageen, waxaannu ku jiray muddo saddex saacadood ah oo kulaylkii baabuurka gudihiisu sababay in naftu ka baxdo baxo, sida lagu daabacay wargeyska The National ee ka soo baxa Imaraadka.

Qoyskaas oo ku noqday gurigooda waqti wiilkoodii yar mar hore geeriyooday, ayaa ka war helay in aan wiilkoodu nuuxsanayn, kadibna waxay ula carareen cusbitaal la yidhaa Al Dhaid, waxaanay dhakhaatiirtu u sheegeen inuu mar hore dhintay.

“Waxa cad wiilkan oo aan wax hawo ah loo banayn ay qoyskiisu dayaceen, arrintana waa mid aad u halis ah, waana wax loo baahan yahay in tallaabo adag laga qaado qoysaska dayaca carruurta yaryar.” Sidaa waxa yidhi Nasser Lakhraibani Al Nuaimi oo ah Xoghayaha Guud ee Wasiirka Arrimaha Gudaha, madaxna u ah Guddida Ilaalinta Carruurta ee Imaaraadka Carabta.

Dr. Fakhri Azzam oo ah dhakhtar ku takhasusay cudurrada carruurta, ayaa isaguna sheegay in ilmaha yar u dhintay hawo la’aan iyo kulayl, waxaannu yidhi; “Gaadhi oo xidhan waa uu keena hawo la’aan iyo heerkulka gudahiisa oo aad u kaca, ilmaha yar heer kulkiisuna aad buu u kululaaday, waxaannu gaadhigu yaalay meel falaadhaha cadceeddu toos ugu soo dhacayeen.”

Bishii May ee sannadkii 2009 ayaa gabadh yar ku dhimatay magaalada Abu Dhabi, kadib markii lagu illaaway bas dugsiga ay ku tegaysay, iyadoo ay geerideeda sababtay kulayl badan oo haleelay iyo naqaska oo ku dhigay.

Ibraahim Khadar siciid

Togdheernews.com

Nin Dhacay Hoolkii uu ku Dhigtay Xafladii Arooskiisa

kayse — Thu, 23 May 2013 19:36:07 +0000

Nin u dhashay Ingiriiska, ayaa xaday hool uu xafladdii arooskiisa ku qabsaday, kadib markii isaga iyo saddex ay saaxiib yihiin oo hubaysan dib ugu noqdeen hoolkii caruuskiisu ku qabsoomay, dabadeedna ka qaateen lacag badan, khamri iyo kombuyuutarro hoolka dhex yaallay.

Mr. Christopher Richard oo gabadhiisu uurkii ugu horreeyey u leedahay, ayaa haatan xabsi ugu jira dhaca uu sameeyey habeenkii arooskiisa ee uu ku haboobay hantida hoolkii uu ku aqalgalay.

Ninkan iyo saaxiibaddii waxay sidoo kale hudheelka uu ku aroostay markii ay dhacayeen u geysteen khasaar baaxaddiisa lagu qiyaasay £20,000 lacagta Ingiriiska ah, iyagoo jajabiyey albaabooyin kala duwan iyo gidaarrada hoolka arooskiisu wax yar ka hor ka dhacay.

Xisaabiyaha hudheelka la dhacay Mr. Catherine Murhphy, ayaa qiimaha hoolka lagu kireeyo kala badh ka daayey ninkan dhaca ula badheedhay, kadib markii isaga iyo xaaskiisu ku andacoodeen in aanay wax lacag ah haysan. Sidoo kale, waxa bilaash looga dhigay cuntada 90 qof oo martida xafladda arooskiisa ka qaybgalay ka mid ah.

Mr. Richard ayaa xabsiga la dhigay, kadib markii kamarada amniga ee loo yaqaan CCTV qabteen isagoo boobaya hoolkii arooskiisu ka dhacay, dabadeedna sawirradiisa lagu daabacay wargeys maxalli ah oo ka soo baxa dalka Ingiriiska.

ibraahim Khadar Siciid

Togdheeernews.com

Carruurta Sigaarka Lagu Dul Cabbo oo Aakhirka Noqda Qaar Bulshada ka Dhex Baxa, Dabeecaduna ka Xumaato

kayse — Thu, 23 May 2013 08:20:03 +0000

Ubadka aadka u yaryar ee waalidkood amma dadka ka qoyska kala tirsan sigaarka ku dul cabbaan, ayaa la caddeeyey inay noloshooda dambe noqdaan qaar bulshada ka soocma oo dabeecaduna ka xumaato.

Cilmi-baadhis ay sameeyeen khubaro reer Kanada ah, ayaa sheegtay in qiiqa sigaarka ee carruurtu naqas ahaan u qaato inuu dhaawac ku keeno maskaxda ubadka da’doodu ka yar tahay 10 jirka, dabeecadoodana ka dhiga mid dhinaca qalloocan wax u aragta, aakhirkana dadka la collowda oo cuqdad ka qaadada dadka la nool.

Dr. Linda Pagani iyo Dr. Caroline Fitzpatric oo ka tirsan Jaamacadda Montreal ee dalka Kanada, ayaa sheegay in ubadka qiiqa sigaarka lagu cabbo qaata ay noqdaan kuwa dabeecaddu ka xumaato oo dagaal badan.

“Qaadashada hawada qiiqa sigaarka ka soo baxa wasakhaysay ee ubadka yaryar hawada ay qadanayaan u raaca waxay halis ku tahay maskaxdooda. Macluumaadkayaga oo aannu ku eegnay maskaxda 20,055 (laba kun, shan iyo kontan) carruur ah oo da’ ahaan hoos uga yar 10 jir, waxana laga waraysanayey guriga sida dabeecadoodu ku tahay iyo fasallada oo macalimiinta la waydiinayey in ay ka warbixiyaan. Sidaa awgeed, waxa noo soo baxday in ubadka sigaarka inta badan lagu ag cabaa yihiin qaar dagaal badan oo dabeecad adag,” ayey tihdi Dr. Pagani oo la hadlaysay wargeyska la yidhaa Epidemiology and Community Health.

editor@togdheernews.com

siyaasadeed Muujinaya Masuuliyiinta Somaliland iyo Mid Kasta Waxa Maskaxdiisu ku Maqan Tahay Qormada 2aad

kayse — Thu, 23 May 2013 07:51:59 +0000

Qaybta labaad ee taxanaha kaftan-siyaasadeedka ah ku soo bandhigi doonna naanaysaha xanta ah ee suuqa ugu jira Wasiiru-dawlayaasha, Wasiir-ku-xigeennada iyo qaar ka mid ah agaasimayaasha guud ee wasaaradda Xukuumadda Somaliland, waxaanay kala yihiin sidan;

WASIIRU-DAWLAAASHA & WASIIR-KUXIGEENNADA:

Wasiir Keyse Cabdi Yuusuf, Wasiirul-dawlaha Nabadaynta Gobollada Bari, dib-ugu-noqosho jabhadayn ayuu ku maqan yahay.

Mr. Cismaan Cabdillaahi Saxardiid (Caddaani), Wasiiru-dawladaha Maaliyadda, guul-wadaynta Madaxtooyada ayuu ku maqan yahay.

Md. Cabdillaahi Abokor, Wasiiru-dawlaha Amniga ee Wasaaradda Daakhilliga, dhulka warshadda sharaabka ayuu ku maqan yahay.

Md. Cabdillaahi Maxamed Daahir (Cakuse), Wasiir-ku-xigeenka Warfaafinta, mirqaan ayuu ku maqan yahay.

Md. Cali Xaamud Jibriil, Wasiir-ku-xigeenka Waxbarashada, difaacidda Maayarka Saylac ayuu ku maqan yahay.

Md. Mowliid Maxamuud Ibraahim, Wasiir-ku-xigeenka Arrimaha Dibadda xafiis aan shaqo ka socon ayuu ku maqan yahay.

Md. Cabdisalaan Maxamed Xasan; Wasiir-ku-xigeenka Macdanta iyo Biyaha, biil-raadis ayuu ku maqan yahay.

Marwo Nimco Xuseen Qawdhan, Wasiir-ku-xigeenka Caafimaadka, FGM (Gudniinka fircooniga) ayey ku maqan tahay.

Md. Cismaan Garaad Soofe, Wasiir-ku-xigeenka Maamulka ee Wasaaradda Arrimaha Gudaha, qanjiidhinta kabka dawladaha hoose ayuu ku maqan yahay.

AGAASIMAYAASHA GUUD:

Mr. Xasan Cumar Hoorri, Agaasimaha Guud ee Boosaha iyo Isgaadhsiinta, lambarrada cusub ee telefoonnada lagu daray (063) ayuu ku maqan yahay.

Mr. Faysal Cali Sheekh, Agaasimaha Guud ee Wasaaradda Arrimaha Dibadda, warfaafinta ayuu ku maqan yahay.

Mr. Cabdirashiid Jibriil Yuusuf, Agaasimaha Guud ee Warfaafinta, is-naaxin ayuu ku maqan yahay.

Mr. Abiib Axmed Cali, Agaasimaha Guud ee Wasaaradda Warshadaha, suuqa ayuu ku maqan yahay.

Mr. Cabdisamad Cumar Maal, Agaasimaha Guud ee Wasaaradda Daakhliga, siminaar ayuu ku maqan yahay.

Mr. Xasan Cabdi Madar, Agaasimaha Guud ee Wasaaradda Madaxtooyada, daawashada xiinka iyo dhaqdhaqaaqyada Wasiir Xirsi samaynayo ayuu ku maqan yahay.

Mr. Maxamed Faarax, Agaasimaha Guud ee Degaanka, hudheelkiisa Dacar-budhuq ayuu ku maqan yahay.

Maxamed Muuse Xaaji (Gallaydh), Agaasimaha Guud ee Wasaaradda Caddaaladda, xafiiska UNDP ayuu ku maqan yahay.

Maxamed Cilmi Aadan (Ilka-case), Agaasimaha Guud ee Kalluumaysiga, xarumaha NGO-yada ayuu ku maqan yahay.

Mr. Cabdillaahi Case, Agaasimaha Guud ee Wasaaradda Beeraha, arrad-bax iyo alaab-iibsasho ayuu ku maqan yahay.

Cali Maxamed Cabdulle (Biikalo), Agaasimaha Guud ee Dib-u-dejinta, xarrago ayuu ku maqan yahay.

Mr. Axmed Cabdi Nuur (Guray), Agaasimaha Guud ee Caafimaadka, raadin tallaal-ka-macaash ayuu ku maqan yahay

Mr. Khadar Axmed Diiriye; Agaasimaha Tacliinta Sare ee Wasaaradda Waxbarashada, muraad-ka-raadiska jaamacadaha ayuu ku maqan yahay.

Mr. Mustafe Qodax, Agaasimaha Guud ee Wasaaradaha Ciyaaraha, xinka wasiirka iyo xidhiidhada ciyaaraha ayuu ku maqan yahay. Iska eeg liiska dambe qaybta saddexaad ee taxanahan oo aad u xiiso badan, isla markaana ka dhex muuqdaan inta badan madaxda hay’adaha dawladda ee madaxbannaan…..

xigasho Jamhuuriya

Gabadh Yar oo Ikhtiraacday Qalab 20 Ilbidhiqsi Baytariga Moobilka ku Dabaynaya/SAWIRO

kayse — Tue, 21 May 2013 17:53:51 +0000

Gabadh da’deedu yar tahay oo u dhalatay Gobolka California ee dalka Maraykanka, ayaa soo jiitaday dareenka shirkadda Google, kadib markii ay dunida ku soo kordhisay qalab yar oo baytariga telefoonka gacanta ku dabaynaya 20 daqiiqo oo kaliya.

Jaarjarkan xawaaraha ku dabaynaya moobillada waxay samayntiisu ka soo fushay maskaxda gabadh 18 jir ah oo la yidhaa Esha Khare, taasoo ku guulaysatay lacag dhan $50,000 doollar oo ay siisay shirkadda Intell International Science and Engineering Fair, waxana lacagtan lagu guddoonsiyey xaflad ay madax badan iyo ganacsato adduunka ka kala yimi ka qaybgaleen.

Mss. Esha ayaa in muddo ah ku riyoonaysay inay mar uun aragto jaarjar ay maskaxdeeda ka keentay oo dadweynaha dunidu ku dabaystaan baytariyada baabuurta iyo telefoonnada gacanta.

Gabadhan yar oo dhigata Jaamacadda Harbard, ayaa u sheegtay telefishanka CBS San Francisco in tallaabadan tahay hordhac, kadibna adduunka lagu baahin doono.

“Telefoonkayga gacanta baytarigiisu wuu iga xumaaday, waannu dhintay, dabadeedna waxa igu dhalatay sidii aan u soo saari lahaa qalab si fudud iigu dabeeya,” ayey tidhi Khare oo wakaaladda wararka ee NBC News weydiisay waxyaabaha ku dhiirrigeliyey samaynta qalabka yare e ay ikhtiraacday.

Qalabka baytariyada lagu dabaynayo ee gabadha da’da yar daaha ka qaadday wuxuu 10,000 jeer ka dhaqso badan yahay inta jaarjarrada hadda caalamka ka jiraa wax ku dabeeyeen.

Guud ahaan shirkadaha waaweyn soo soo saara qalabka elektarooniga ee adduunka, ayaa waxa si weyn uga yaabiyey sida gabadhan 18 jir ah u samaysay qalabka ay maskaxdeeda ka hindistay oo xoog u soo jiitay indhaha shirkadda adduunka ugu lacagta badan, waxana Khare la soo xidhiidhay Google si ay ugala shaqayso sidii qalabkaeeda cusub loogu beddelo aalad lagu dabeeyo baytariyada moobillada.
Ibraahim Khadar Siciid

Togdheernews.com

Dalka Kaalinta ugu Horreeya Kaga Jira Adduunka ee Qoomiyado Kala Duwan ku Nool Yihiin

kayse — Mon, 20 May 2013 16:12:06 +0000

Cilmi-baadhis qaadatay muddo 11sanno ah oo ay fulisay Jaamacadda Harvard ee Maraykanka, gaar ahaan mac-hadkeeda dhaqaalaha oo lagu sameeyey 650 qabiil oo ku kala nool 190 waddan oo adduunka ah, ayaa bedka soo dhigtay inuu dalka Uganda ee bariga qaaradda Afrika ku yaal kaalinta ugu horraysa ka galay dalalka ay ku nool yihiin qoomiyadaha kala duwan, halka Koonfurta Kuuriyana kaalinta ugu hoosaysa kaga jiro waddamada qabiillada kala duwan ku dhaqan yihiin.

Daraasaddan oo beenisay fikirkii ahaa in waddamada reer galbeedku yihiin kuwa ugu badan ee dadka kala geddisan ku nool yihiin, ayaa Jaamacaddan caanka ah waxay isticmaashay macluumaadyo caalami ah, taarikho, xogo laga helay hay’adda sirdoonka Maraykanka ee CIA iyo daraasad la sameeyey 1998kii oo ku saabsanayd qabiilooyinka daafaha adduunka ku nool.

Waxa kaloo la isticmaalay xog-ururin la xidhiidha in laba qof si kala duwan loo doorto mid walba la weydiiyo qabiilkiisa, iyadoo la eegayey in ay isku mid noqdaan amma jawaabo kala duwan bixiyaan.

Dalka Uganda waxa uu hoy u yahay 40 qabiil oo asal ahaan waddankaas wada deggan, kuwaasoo ay ku jiraan qabiilooyinka Baganda, Iteso, Basoga iyo Banyankore oo dhammanatood mid kastaa isticmaalo luqd, dhaqan iyo caado u gaar ah oo aan cid kale la wadaagin.

Sidoo kale, waddanka Koonfurta Kuuriya ayaa noqday dalka qudha adduunka ee aan lahayn wax qabiil ah, dadka ku noolna isku qoomiyad yihiin.

Waddamada Yurub dalka Ingiriiska iyo Faransiiska ayaa noqday labada waddan ee qoomiyado kala duwan oo aad u tiro badan ku nool yihiin

Afrika waxa loo aqoonsaday inay noqotay qaaradda qoomiyadaha kala duwan ee ugu badan ku dhaqan yihiin, marka loo eego qaaradaha kale ee adduunka, waayo 20-ka dal ee ugu sarreeya kala duwanaanshaha qoomiyadaha ku nool dhammaantood waa Afrikaan.

Daraasaddan ayaa daba socotay i cilmi-baadhis hore daaha ka qaadday dalalka aan ajnebigu ku noolaan karin oo ay ugu horreeyeen Bangladesh, Urdun liyo Hindiya.

Ibraahim Khadar Siciid

Togdheernews.com

Isticmaalka Badan ee Telefoonka Gacanta oo Sababa Dhiig-kar

kayse — Mon, 20 May 2013 16:08:12 +0000

Isticmaalka badan ee telefoonnada gacanta ayaa la xaqiijiyey inuu sababo xannuunka dhiig-karka oo keenay inay hadallo qallafsan isweydaarsadaan dadka moobillada ku wada xidhiidha, siday sheegtay cilmi-baadhis cusub oo ay sameeyeen dhakhaatiir Talyaani iyo Maraykan ah.

Cilmi-badhayaashu waxay heleen in ku hadalka telefoonka kor u qaado xawliga dhiigga, kadibna garaaca wadnuhu bato, sidaasna qofka ku qaado dhiig-kar halis ah.

Daraasaddan oo 12 jeer dhiig-kar laga cabiray 94 bukaan oo qaba cudurkan, waxa lagu ogaaday inay cudurkaas ka qaadeen telefoonka oo dhibaatooyin looga sheegay amma ay qof kale isku waydaarsadeen hadallo aan munaasib ahayn.

Dadka cilmi-baadhistan lagu tijaabiyey oo celcelis ahaan da’doodu tahay 53 jir, waxa badankooda si raaxo leh loogu fadhiisiyey kursi, kadibna waxa la taliyey dhakhaatiir, iyadoo lagaga tegay qolalka kelidood, dabadeedna waxa laga qaaday baadhitaankii ugu horreeyey ee xawliga dhiiggooda, kadibna cilmi-badhayaasha ayaa telefoon u diray dadka bukaanka ah ugu yaraan saddex jeer, waxana natiijada soo baxday ay noqotay in dadkii telefoonka loo diray qaar badan oo ka cadhooday uu dhiiggoodu xoog u kacay.

Ururka Dhakhaatiirta Wadnaha Maraykanka, ayaa tilmaamay in dadka waaweyn ee telefoonnada isticmaalaa uga halisaysan yihiin dhallinyarada qaadista cudurka dhiig-karka, waxaanay khubaradu sheegeen in qofka 30 telefoon wax ka badan maalintii garaca inuu halis ugu jiro in dhiig-kar ku dhufto.

“Dadka waayeelka ah way uga halisaysan yihiin da’ yarta inuu ku dhaco cudurka dhiig-karku, sababtoo ah telefoonka badan wuxuu ku keenaa dadka waaweyn in ay cadhoodaan, isku buuqna ku furmo, taasina u horseedo dhiig-kar.” Sidaa waxa yidhi Dr. Giuseppe Crippa oo ka tirsan cusbitaalka la yidhaa Walliam of Saliceto Hospital oo ku yaal dalka Talyaaniga.

Ibraahim khadar Siciid

Togdheernews.com

Nairobi: Nin iyo gabadh looga Shakiyey Qarax oo Lagu Dilay Hawlgal Qaatay Sideed Sacadood

kayse — Sun, 19 May 2013 12:50:33 +0000

Nairobi-(TogdhNews)- Nin loo maleynayo in uu ka tirsanaa kooxaha argagaxisada ah iyo xaaskiisa ayaa aroortii saaka lagu dilay magaalada Nairobi ee caasimadda Kenya, bambana waa laga helay gurigiisa.

Lix boolis ah ayaa ku dhaawacmay howlgal qaatay siddeed saacadood oo boolisku ay doonayeen inay ku xidhaan ninka.

Boolisku waxay sheegeen in ninku uu qorsheynayay in uu weerar argagaxiso ah ka geysto magaalada Nairobi.

Eedeysanaha ayaa la sheegay inuu iska caabbiyay booliska, wuxuuna bambooyin ku tuuray booliska isagoo dhaawacay lix askari, kuwaas oo la dhigay isbitaalka, xaaladdooda caafimaadna ay wanaagsan tahay.

Eedeysanaya ayaa lala xiriirinayaa ninka xiran ee lagu magacaabo Elgiva Oliacha Bwire kaas oo maxkamad ku taalla magaalada Nairobi ay dabayaaqadii 2011 ku xukuntay xabsi daa’in kaddib markii lagu helay in uu ka dambeeyay qaraxyo magaalada Nairobi ka dhacay 2011.

Edito@togdheernews.com

Xildhibaannada Wata Mooshinka ka Dhanka ah Ra’iisal-wasaaraha Soomaaliya oo Hudheellada Laga Horjoogsaday

kayse — Sun, 19 May 2013 12:36:03 +0000

Xildhibaannada Baarlamanka Soomaaliya ee dabada ka riixaya mooshin ka dhanka ah Ra’iisal-wasaare Saacid oo dhowaan Baarlamanka hordhigay, ayaa shaaca qaaday in ciidamo ka tirsan nabadsugiddu ka horjoogsadeen kulan qado ah oo ay ku lahaayeen hudheel ku yaal magaalada Muqdisho.

Xildhibaannada mooshinka watay oo shir-jaraa’id ku qabtay shalay xarunta Golaha Shacabka Qaranka ee Muqdisho, ayaa cambaareeyey tallaabada ay kala kulmeen ciidanka nabad-sugidda, kuwaasoo falkaas ku tilmaamay mid sharci-darro ah oo ka soo horjeedda awoodda ay u leeyihiin iney yeeshaan kulamo iyaga u gaar ah.

“Hudheelka City Plaza ayaannu ka dalbanay inuu noo diyaariyo qado ay ka qaybgalayaan 110 xildhibaan oo halkaas ku yeelan lahaa kulan ay uga hadlayaan danaha ummadda. Markii duhurkii la gaadhay ayuu maamulka hoteelku nagu wargeliyey in ciidamo ka tirsan nabadsugiddu u yimaaddeen, amarna ku bixiyeen inaan kulankaas la qaban karin.” Sidaa waxa yidhi Cali Khaliif Galeydh oo ka mid ah xildhibaannada ka qeybgeli lahaa kulankaas qadada ah.

Sidoo kale, xildhibaan Cumar Islow oo isna shirkaas jaraa’id ka hadlay, ayaa sheegay in tallaabadaasi tahay mid ka horimaneyso dastuurka dalka oo dhigaya in xildhibaannadu ku kulmi karaan meeshii ay doonaan, isla markaana aanay jirin cid ka horjoogsan karta, wuxuuna ugu baaqay madaxda dawladda Soomaaliya inay arrintan jawaab degdeg ah ka bixiyaan, haddii kale u arki doonaan iney iyagu ka dambeeyaan.

Ma jiro illaa hadda war jawaab u ah eedeeymahan oo ka soo baxay laamaha ammaanka iyo saraakiisha dawladda Soomaaliya, isagoo Wasiirka Daakhiliga oo wax laga weydiiyeyna uu ka gaabsaday inuu ka hadlo arrintaas.

editor@togdheernews.com

Shirkad Shaqaalaheeda ka Mamnuucday in ay Shaqada la Galaan Telefoonnada Gacanta

kayse — Fri, 17 May 2013 18:34:12 +0000

Shirkad ku taal caasimadda Abu Dhabi ee dalka Imaraadka Carabta, ayaa shaqaalaheeda ka mannuucday inay goobta shaqada la galaan telefoonnadooda gacanta ee gaarka ah, waxaanay masuuliyiinta shirkaddaasi ku hanjabeen in qofka lagu qabto isagoo ka jawaabaya moobilkiisa uu shaqada waayi doono.

Shirkaddan oo magaceeda la qariyey ayaa shaqaalaheeda la socodsiiyey in moobillada laga ururinano marka ay shaqada galaan, isla markaana lagu ridayo meelo gaar ah oo hadhow markay shaqadooda ka baxaan looga saraayo, waxana ogaysiisan gidaarrada xarunta shirkadda lagu dhejiyey bil ka hor, iyadoo dhammaan shaqaalaha amar lagu siiyey inuu telefoonkiisa gacanta kaga dultago miis loo qoondeeyey, kadibna lagu qufuli doono khaanad gaar ah.

Hase ahaatee, waxa arrintaas cadho weyn ka muujiyey shaqaalaha shirkaddaas oo sheegay in tallaabadani tahay mid madaxdoodu ku farogelinayaan arrimahooda gaarka ah.

“Arrintan waa mid xun oo bani’aadaminimada ka soo horjeedda. Moobilka anigaa iska leh, waxaanan xaq u leeyahay inaan haysto, sidaan doonana u isticmaalo marka aan shaqada ku jiro, waayo ma nihin addoomo.” Sidaa waxa mareegta XPRESS u sheegay mid ka mid ah shaqaalaha shirkaddaas oo magaciisa qariyey.

Shirkadda amarkan ku soo rogtay shaqaalaheeda oo ddiiday in ay war rasmi ah ka soo saarto tallaabada ay ku kacday, ayaa haddana sarkaal ka tirsan maamulka shirkaddaasi waxa uu sheegay in aanay doonayn in shaqaalahoodu waqtiga lumiyaan, waxana ka mid ah hadalladiisii; “Waa arrin ay xaq u leeyihiin inay telefoonnada u gaarka ah ka jawaabaan marka ay shaqada ku jiraan, laakiin annaguna siyaasad noo gaar ah ayaannu samaysannay, mana doonayno in qofna soo farageliyo arrimaha u gaarka ah shaqaalayahaga.”

“Dabcan haa, halkan waxaannu u joognaa inaannu shaqaysano, waqtigana lumin. Taas macnaheedu maaha in aanaan ka jawaabi karin telefoonnada noo gaarka ah. Buugga siyaasadda lagu soo rogay ma sheegayo in aan moobil la qaadan karin, balse waannu yaabnay markii ay afka nooga sheegeen in telefoonnadayada aannu miiska kaga dul tagno.” Sidaana waxa yidhi qof kale oo shaqaalaha shirkaddan ka tirsan.

Ibraahim Khadar Siciid

Togdheernews.com