Xukunkan oo ay soo saareen saddex garsoore oo ka tirsan Maxkamadda Rafcaanka degmada Columbia, waxa lagu mamnuucay codsi ka yimi kooxo sawirradaas hayey oo dalbay in loo fasaxo baahintooda.

Garsoorka Maraykanka ayaa sheegay in aan la baahin karin sawirrada laga qaaday Osama bishii May ee sannadkii 2011, waqtigaas oo ciidammada Maraykanka oo si khaas ah u tababaran ku dileen guri uu ka deganaa magaalada Abbottabad ee dalka Pakistan.

Maxkamaddu waxay aqbashay codsi uga yimi maamulka Maraykanka oo sheegay in sawirradan yihiin qaar halis ah oo abuuri kara rabshado iyo mudaharaadyo dalkooda khatargelin kara.

“Wax muran ah kuma jiro in dawladdu xaq u leedahay ilaalinta sawirradan, kana hortago khatar kasta oo ay dhalin karaan, sidoo kalena ilaaliso wax kastoo ka soo horjeeda danaha dadka Maraykanka ah,” ayaa lagu yidhi qaraarka maxkamaddu ku mamnuucday shaacinta sawirrada meydkii Osama Bin Laden.

Sidoo kale, waxa ay Maxkamaddu ku amartay hay’adda sirdoonka Maraykanka ee CIA-da inay ka reebaan xeerka xorriyada xaqa cabbirista rayiga iyo in shacabku helaan dokumantiyada ay dawladda uga baahan yihiin.

Sawirradan ayaa la sheegay inay si gaar ah u muujinayaan meydkii Osama oo yaal gurigii lagu dilay, markii la soo qaaday ee la saaray markabka iyo sidii badda loogu aasay.

Ibraahim Khadar Siciid

Togdheernews.com

Waxaanay Ciyaartoygani shaaca ka qaadeen khilaaf ka dhex aloonsan kooxaha ciyaaraha gobolka Togdheer.

Waxaana halkaasi ka hadlay Maxamed Cabdi Maxamed (Cadho) waxana hadaladisi ka mid ah “ khilaafka ciyaartoyga gobolka oo muddo soojiitamaayey  ayaa waxa dhacday munaasibadi 18 may ee ciyaar lagu xusaayey oo maayirka magaaladda Burco soo qaban qaabiyey oo lagu macsuumay gobolka Hawd si ay ciyaar saaxibtinimo ula yeeshaan gobolka Togdheer ayaa waxa dhacday markii loo diyaar garoobay ciyaartii waxa khilaaf dhexmaray laba masuul oo ka tirsan wasaaradaha ciyaaraha gobolka togdheer,

halkaaso mid dhaawac la gaadhsiiyey, waxaana dhacdaasi ka dib badhasaabka gobolka Togdheer Axmed  Cabdilaahi  Xamarje joojiyey Ciyaarti ,go’aana ku qaatay in ciyaarta dib loo dhigo, intaas ka dib waxaa soo hadlay wasiirka ciyaaraha Somaliland Cali Siciid Raygal isagoo ku sugan Caynaba waxaana uu si toos ah ula hadlay hogaanka ciidamda  isagoo ku yidhi maxaa loo joojiyey ciyaarta waa in garoonka laga saara ciidamada, iyadoo halkaasi  ciyaartii dib u bilaabmatay ,amarkii wasiirka ka dib ayaa ciyaarti dib loo furay ,

waxaana  wada ciyaaray  kooxdii ka socotay gobolka Hawd iyo koox aan ahayn xulkii gobolka ee loogu talagalay ee markii hore  in ay la ciyaaraan gobolka oo dhamaantood dhinac ka soo wada jeeda , taasina waxay noqotay mid khilaafkii ciyaartoyga sii hurisa, ka dib markii Wasiirka Ciyaaraha iyo Isuduwuhii ciyaaraha gobolku dhinac ka soo wada safteen.

waxa weeyaan Wasiirka ciyaaruhu wuxuu doonaayey in meesha beeli ku ciyaarto , ciyaartoyga gobolka way is hayeen , khilaaf baa ka taagna waanu ogaa .

Waxaanu halkan ka Canbaareynaynaa Wasiirka ciyaaraha Somaliland Cali Siciid Raygal , Masuuliyiinta Wasaaradda Ciyaaraha gobolka, iyo Xildhibaan Bidhi , waxaanu Xukuumada u sheegaynaa haddii aan arrintan wax laga qabanin wixii ka yimaada ay Xukuumaduu masuuliyadeeda dusha u ridan doonto.” Ayuu Cadho.

Sidoo kale waxa halkaasi ka hadlay Farxaan Axmed Maxmed(farxaan Gaab) oo ka mid ah Ciyaartoyga gobolka Togdheer isagoo sheegay in haddi aan khilaafka ciyaartoyga gobolka Togdheer wax laga qabanin ay iyagu ciyaartoy ahaan ku iman doonaan laba bas oo kala gaara tartan ciyaaraha ee lagu qaban doono Hargaysa  “ haddanu nahay ciyaartoyga gobolka Togdheer , anngu halkan waxaanu ka dhaleecaynaynaa Masuuliyiinta ugu sarsaraysa Wasaaradda Ciyaaraha Somaliland, sidoo kale waxaanu dhaleecaynaynaa isuduwaha wasaarada ciyaaraha gobolka Togdheer, waxaan leenahay annagu xul baanu nahay , waanu matalidona xulka aanu nahay , haddi burco wax laga qaban waayo  Burco waxay ku imanaysaa laba Xul”.

Waxaana goobtaasi ka hadlay Maxamuud Aadan Cabdi oo isaguna ka mid ah ciyaartoyga gobolka waxaanu ka hadlay dhacdo ka dhacay ciyaar dhex martay bishan ciyaartoyga gobolka Togdheer iyo gobolka Saaxil, iyadoo halkaasi khilaaf ku dhexmaray qaar ka mid ah ciyaartoyga gobolka ,iyagu isku maandhaafay kabtanka gobolka, isagoo ciyaartoygani  sheegay inuu isagu  gacanta ka dhaawac yahay, iyado ciyaartoyga gobolka Togdheer  ay markii ciyaartu dhamaatay isku soo laayeen jidka.

Waxaanu Maxamed Aadan Xukuumada ugu baaqay in ay si deg deg ah u soo dhex gasho khilaafka ciyaartoyga gobolka Togdheer.

Sidoo Kale waxa goobtan ka hadlay Qaar ka mid ah ciyaartoygi hore ee gobolka, iyagoo  ugu baaqay xukuumada la xaliyo khilaafka ciyaartooygada soo kala dhex galay.

Khilaafka ka dhex aloonsan kooxda ciyaartoyga gobolka Togdheer kuma koobna iyaga oo kaliya , Balse waxa uu ka dhex jira masuuliyiinta wasaaradda ciyaaraha ee gobolka .

Wasiirka ciyaaraha iyo dhalinyarada Somaliland Cali Siciid Raygal oo maalintii sabtidi soo gaadhay magaaladda Burco , lana filaayey in uu khilaafkan wax ka qabto ayaa isagu dhagaha ka furaystay oo u anbabaxay magaaladda Hargaysa .

Bishii Jeenaweri ee sanadkan ayay ahayd markii Agaasimaha Guud ee Wasaaradda Dhalinyarada iyo Ciyaaraha Somaliland uu soo dhexgalay khilaafka ka dhex aloonsan wasaaradda Ciyaaraha ee gobolka Togdheer.

TogdheerNews.

Burco/Office.

Suldaan Maxamed Muuse waxa uu si xiiso leh uga sheekeeyay xaasaskiisan badan ee uu ku guulaysay inay rabash la’aan ugu noolaadaan hal guri iyo waliba sidii uu ku guursaday haweenkan ee ay ugu suurto gashay inay goob wada dagaan.

Suldaan Maxamed Muuse haddii taariikhdiisa aynu in kooban ka soo qaadano waa dhawr iyo sodan jir, waxa uu dhalay 14 caruur ah oo ay uga nool yahiin toban ka mid ah, waxa uu nolashiisa inta badan ku qaatay barashada shareecada, waxaanu wakhti dheer macalin ka ahaa cilmiga diiniga ah.

Sida oo kale Suldaan Maxamed Muuse waxa uu talooyin u soo jeediyay dadka inta badan baqaha ka qaba guurka iyo waliba dadka yasa beesha uu ka soo jeedo oo ka mid ah beelaha la haybsooco. Waxa uu arimahan suldaanku kaga hadlay waraysi gaar ah oo uu kula sheekaystay wargeyska Geeska Afrika.

Ugu horayntii Suldaan Maxamed Muuse Nuur ( Abi-Sufyaan )oo si kooaban taariikhdiis uga sheekaynayaa waxa uu yidhi“ Waxaan ku dhashay 1981 magaalada Burco,waxbarashdayda hoose dhexe ilaa sarena iyada ayaan ku soo qaatay, imikana waxaan ku jiraa jaamacada Golis kuliyada shareecada,runtii waxbarashadaydu waxay u badnayd dhanka diinta oo aan inbadan dhigtay inbadana meelo kala duwan aan ku dhigay oo wakhti dheer aan macalin ku soo ahaa.”

Taariikhdaas ka dib waxa aanu su’aalnay bal inuu nooga waramo afarta xaas ee guriga wada degan iyo sida ay ugu suurto gashay  “ Reerahan imika ii dhisan reerkii ugu horeeyay sandii 2003 ayaan guursaday, markii aan guursaday iyo guurkayga ka horba waa ay ku jirtay qorshahayga inaan reero badan yeesho oo aan xaasaska badsado, laakiin isma lahayn shaqsiyan waxa suurto galaysa intaad afar reer guursato inay meel wada degaan.waxaana isku dayay markii ugu horaysay ee aan guursaday xaaskayga weyn inaan aad isku fahano oo aanu isku aragti noqono arinkaas oo iisuuto galay, inkasta oo ay tahay qof dumar ah oo marka aad tidhaahdo waan kula guursanayaa ay caadifadeedu kacayso waanay adagtahay inay markiiba arinakaas oo kale aqbasho, laakiin hadana waxay ku xidhantahay hadba ficilka ay odaygeeda ay ka aragto. ugu horayntii markii ugu horaysay ee ay iga maqashay inaan reer kale samaysanaayo caadifadeedu aad ayay u kacday, laakiin waxaan ku dedaali jiray inbadan inaan ka dhaadhiciyo in aanan hawshaas galayn ilaa go’aan aynu ka gaadho, waanan u sheegi jiray inaan awood u leeyahay inaan ka dul talaabsado oo aan reer Samaysto iyada oo diidan laakiin mar kastaba waxaan jeclaa inaan arinkaas galo adiga oo talo ku leh, in badan way idiiday waxaanu da’daalkaygu ahaa inaan arinkaas ka dhaadhiciyo inay ila qaadato. Inaan guur labaad sameeyo waxay iga aqbashay markii ilmahii koowaad uu noodhashay ee aniguna aan mudo arinka ka hadlaayay. Waxaan inbadan ku da’daalay in aanay xaaskayga weyn u fahmin inaan iyada ka xiiso dhacay oo aan sidaas ula guursanaayo ee aan doonayo inaan taranta badiyo.”

Suldaan Maxamed Muuse oo hdalkiisa siiwataa waxa uu yidhi “ Aragtidii waa ay ila qaadatay waxaanan intaa ka dib u sheegay inay iyadu soo baadho gabdhii aan minyaraysan lahaa oo ay dookheeda ku keeno, runtii aad ayaan ula imi calool adayg badan waayo mar kasta waan filaayay inay isbadali karto, maan haysan dhaqaale badan oo aan waxbadan ku qarqiyo waxa la’la yaabana waxa igu noqday mirkii ay xaaskaygan aan la guursanayaa ay isgu tidhi waxa hinaaso tir ah uma baahni waliba waan ku caawinayaa oo kuma hagardaamaynaayo, arinkaasu aniga farxad weyn ayuu ii ahaa.intaas ka dib waxaanu gudo galnay dhisida gurigii labaad waxaanan gabadhaydan labaad ku wada sheekaysanay xaaskayga weyn gurigeeda, arinkaasu gabadhan cusub waa uu ku adkaaday laakiin waxaan u sheegay in aan anigu ka masuul ahay xaaskayguna arinka ay raali la tahay, guurkii waa uu dhacay  xaaskiina cusbaana guri kale ayaan dajiyay, laakiin markiiba waxaan dareemay xoogaa xifiltan ah iyo in xaaskaygii cusbayd ay isku dhererisay islaantaydii hore iyaduna ay arinkaas aad u diidantahay, arintaasi fikir culis ayay igu dhisay wax dhaqaale ahna maan hayn laakiin waxaan goostay inaan xaas sadexaad keeno si dagaalkan uu uga soo wareego xaaskaygan hore oo aanu jawi cusub hadana u galno, inkasta oo arinkaas ay aad u diiday xaaskaygii labaad oo ay tidhi ma aniga oo aan ilmihii u horeeyayba dhalin ayaad ila guursan doonta,  hase ahaatee inbadan markii aan ku celceliyay waa ay ila qaadatay oo arinka waa ay ila aqbshay, gabdhii sadexaadna waan meheriyay waliba aniga oo kula sheekaystay xaaskaya labaad gurigeeda.” Suldaanku wali isaga oo arinkan xiisaha badan ka sii hadlaaya waxa uu yidhi “  Yoolkii islaantii weynayd waa uu ka soo wareegay, laakiin arin kale ayaa markiiba meesh yimi oo xaaskan sadexaad ee aan mahersaday waxay saaxiib la noqotay islaantaydii waynayd taas oo culays ku keentay xaaskaygii labaad oo iyadu u qaadatay in loo heshiiyay oo ay go’doon gashay, waxaan ugu qalbi qaboojiyay in aan aniguna iyada la jiro mar hadii ay labadii kale heshiiyeen, hadalkaygani culayskii kamuu dajin xaaskaygii labaad waxaan u sheegay in ay fursada iska lumisay oo ay ahayd intaan xaaska sadexaad iman inay la heshiiso gabdha weyn, arinkii oo sidii ah ayay umushay xaaskaygii labaad markaas waxay u baahatay cid caawisa, xaaskayga weyn oo aad u naxariis badan oo aan calool ku sid lahayn ayaa markaas bilawday caawinteeda, caawintaasu waxay sabab u noqotay in xaaskaygii weyn aan ka codsado inay guriga la soo dagto xaaskayga labaad ee umashushay mar hadii ay caawinayso si ay ugu fududaato arintaas oo fure u noqotay inay afartayda qoys meel ku wada noolaadaan.”

Suldaan Maxamed Muuse oo hadlakiisa sii wataa waxa uu yidhi “ Markay labadaydii xaas ee hore isku meel dageen islaantaydii sadexaad ee aan  mehersanyd waxay go’aan ku gaadhay inay iyaduna labadan qoys la soo dagto oo ay qol guriga ka mid ah ay ku aqal gasho, arinaas oo aniga muhiimad gaar ah ii yeeshay, aqal galkaasuna sidaas ayuu ku dhamaaday. Intaas ka dib waxaad moodaysay in wali aanay arimahu saxnayan, waxaanan qaaday talaabo adag oo kaligay ah waxaanan guursaday aniga oo aan haweenkayga la tashan sidii hore oo kale inaan guursaday gabdh afaraad, runtii markay ogaadeen inaan xaas afaraad guursaday buuqii dhexdooda waa uu dhameeyay, waxaanan ku idhi iyaduna halkan uunbay soo dagaysaa, laakiin si adag ayay uga horyimaadeen waxaanay iisheegeen in go’aankoodu uu mid yahay oo aanay gabdhaasu kadinka uga soo galayn, dhibta intaas dheeri waxay tahay in gabdhii yarad suuqa ay ka maqashay in dumarkii sadexada ahaa ay u heshiiyeen oo la dilaayo, reerkoodii oo la baqayna Jabuuti ayay u direen, mudo dheer markii ay ku maqnaydna waxay igu yidhaahdeen warqadeeda noo keen, sidaasna waanu ku kala tagnay. Wali waxa aan dareemayay in guriga arimahiisu aanay isku dheeli tirnayan, dabadeedna mar kale waxaan la tashaday xaaskayga weyn, runtiina mar kale waa ay igu taageertay arinkan oo afartuba inay buuxsamaan way doonaysay, waxaana markaas sidaas ku guursaday gabdh afaraad oo iyadu carmal ahayd oo aad u wanaagsan.”

Suldaan Maxamed Muuse  ugu danbayntii warbixintiisan xiisa badan waxa uu ku soo gunaaday “ Ilaa hada waxa ii dhashay 14 caruur ah, oo toban ka mid ah ay nool yahiin, guriga aanu dagenahayna waxa uu ka kooba yahay ilaa 6 qol oo jiingad ah, xaaskastaana waxay degentahay qol u gaar ah, xaafada oo dhan marka aniga layga yimaado maamulka guud waxa ah xaaskayga weyn oo dumarku ay dhamaantood u doorteen inay iyadu noqoto, marka aan anigu maqnahayna taladu iyada ayay ka go’daa inkasta oo ay aad talo wadaag u yahiin, xaaska habeenkaas aan gurigeed u hoyanaayo ayaa dhamaan hawlaha maalintaas qabanaysa haday nadaafada noqoto iyo haday cunto noqotaba, waxa kaliyaata oo laga caawiyaa suuqa oo xaaska habeenka ku xiga aan u hoyanaayo ay ka caawiso, caruurta magacyadoodu waa ay kala duwan yahiin oo qays kasta waxa uu leeyahay xaraf ay magacyadoodu ka bilaabmaan, runtii marka aan gurigayga jooga waa caalam kale wax badan oo kaleba ma haleelo oo aad ayaan u mashquulaa, laakiin waxaan u arkaa inaan guulaystay oo aan sameeyay waxa ku adag inbadan oo dadka ka mid ah.”

Suldaan Maxamed Muuse Nuur ( Abi-Sufyaan ),  waxa uu talooyin u soo jeediyay dadka inta badan guurka cabsida ka qaba waxaanu yidhi isaga oo arimahaas ka hadlaaya “ Waxaan kula talin lahaa in badan oo guurka ka baqata in ay naftooda ku kalsoonaadaan,Runtii hawshan kumaan hirgalin dhaqaale badan oo aan haystay, xoogna haweenkan kumaan qabsan ee iyaga ayaa nolshan aan wadaagnay ku wada qancay, waxa hareeraha ka xigaa waa reerahoodii oo waliba qaarkood intay daaro ka yimaadeen ayay jiingadaas ila dageen, markaas waa in aan haweenka laga baqan waayo inaga ayaa laynoo abuuray, inaan nolsha wadaagnaana waa wax wanaagsan ee wax xun iyo dhibtoona maaha.”

Gunaanadkii waraysigan Suldaan Maxamed Muuse waxa kaga hadlay arimaha reeraha la hayb-sooco oo uu sheegay in loo baahan yahay in meesha laga saaro hoos u eegaas aan mudnayn “ Waxa dardaaran iga ah oo aa intaas ku dari lahaa in beelah aan ka soo jeedo ee aan suldaanka u ahay ee Gabooyaha hoos ayaa loo eegaa in arimkaas meesha laga saaro, bushada marka la qiimaynaayo midgaan marka la soo qaado wax xun ayaa laga fishaa markaas hala ogaado in dadka nooc waliba ay ku jiraan, oo xataa ay samayn karaan wax ku culus bulshada kale ee ay yasayaan arinkan waxaan u arkaa fariin xaga alle ka socota oo awooda aadamah tilmaamaysa, runtiina bulshadan aan ka soo jeedaa wax badan oo lagu xisaabtami karo ayay leedahay ee maaha bulsho wada adoon ah.”

Geeska.

Waa qormo aad iyo aad u xiiso badan oo wargeysku si mala-awaal iyo kaftan ku dheehan yahay akhristeyaashiisa ugu soo bandhigayo kaftan-siyaasadeed tilmaamo ka bixinaya madaxda Somaliland iyo mid kasta kaftanka suuqyada ugu jira ee lagu xanto in had iyo jeer maskaxdiisu ku maqan tahay.

Qormadan oo maalmaha soo socda si taxane ah ugu soo bixi doonta Jamhuuriya waa mid wargeysku ugu talogalay in akhristeyaashiisu ku madadaashaan naanaysaha mala-awaalka iyo kaftanka ah oo taabanaya badi madaxda Somaliland – kuwa xilalka haya iyo qaar aan xilligan xafiisyo fadhiyin, waxaanay qormadani si gaar ah u taabanaysaa masuuliyiinta ku dhex jira saaxadda siyaasadda ee dalka.

Qaybta koowaad taxanaha qormadan kaftanka ah oo ka bilaabmaysa Madaxweyne Axmed Maxamed Maxamuud (Siilaanyo), ku-xigeenkiisa, labada guddoomiye baarlaman iyo dhammaan xubnaha golaha wasiirrada xukuumadda Somaliland iyo weliba mid kasta waxyaabaha lagu xanto ee uu ku maqan yahay waa sidan:

Madaxweyne Siilaanyo magacaabis guddi ayuu ku maqan yahay

Saylici dudmo ayuu ku maqan yahay

Saleebaan-gaal hiil buu ku maqan yahay

Cabdiraxmaan-cirro qosol buu ku maqan yahay

Wasiir Xisri gabay iibsasho ayuu ku maqan yahay

Wasiir Samaale, Muuse Biixi ayuu ku maqan yahay

Wasiir Duur hanjabaad buu ku maqan yahay

Wasiir Geeljire jawaab buu ku maqan yahay

Wasiir Abiib-timacad, Seemaal [degaan u dhexeeya Gabiley iyo Baki] buu ku maqan yahay

Wasiir Xuseen-xoog tallaal buu ku maqan yahay

Wasiir Maxamuud Xaashi guux diyaaradeed ayuu ku maqan yahay

Wasiir Xaabsade iskaraab ayuu ku maqan yahay

Wasiir Cabdi Aw Daahir maxjar buu ku maqan yahay

Wasiir Xaglo-toosiye ballanqaadkii reer Buuhoodle ayuu ku maqan yahay

Wasiir Cadami sheeko ayuu ku maqan yahay

Wasiir Cali Siciid Raygal jacayl buu ku maqan yahay

Wasiir Cali Cilmi Geelle socod buu ku maqan yahay

Wasiir Cabdirisaaq Khaliif Axmed [Wasiirka Ganacsiga] dantiisa ayuu ku maqan yahay

Wasiir Cabdirisaaq Cabdirisaaq Cali Cismaan [Wasiirka Wershadah] istiilid ayuu ku maqan yahay

Wasiir Maxamuud Axmed Barre (Garaad) mooyi meel uu ku maqan yahay

Wasiir Maxamed Cabdillaahi Cumar meeqaam sare ayuu ku maqan yahay

Wasiir Faarax Geedoole sarac-beeris buu ku maqan yahay

Wasiir Samsam Cabdi Aadan iskuul bay ku maqan tahay

Wasiir Sheekh Khaliil Cabdillaahi Axmed malcaamad la furayo ayuu ku maqan yahay

Wasiir Xuseen Cabdi Ducaale dillaal buu ku maqan yahay

Wasiir Xuseen Axmed Caydiid qareennada ayuu ku maqan yahay

Wasiir Sacad Cali Shire qorshe ayuu ku maqan yahay

Wasiir Maxamuud Siciid (Gacamay) [Wasiirka Degaanka] dhuxulaysiga buu ku maqan yahay. Iska eeg liiska dambe ee Wasiiru-dawlayaasha iyo Wasiir-ku-xigeennada xukuumadda… La soco…..

Xigasho Wargayska Jamhuuriya

Mujaahid Ibraahim Dhagaweyne waxa uu ka digay dhalinyarada Somaliland ee u ban-baxay tahriibka dalalka shisheeye oo uu sheegay in ay haliso badan kala kulmaan dariiqooyinka ay u maraan tahriibta, taas oo uu ka waramay qisooyin halis ah oo ay la kulmaan dhalinta tahriibaysaa. Mujaahid Ibraahim Dhagaweyne oo wargeyska Haatuf uu shalay xogwaraysi kooban kala yeeshay arrimahaasi ayaa ugu horayn isagoo ka hadlaya jawigii lagu xusay 18-ka May waxa uu yidhi “Runtii shacbiga Somaliland ee ku kala dhaqan dalka gudihiisa iyo dibadiisuba shucuurtii wadaninimo ee ay ku muujiyeen dabaaldagii xuska 18-may ka soo wareegtay 22 guurada gooni isku taaga Somaliland, waxay ahayd maalin qaran oo aan look kala hadhin, waxaanay shacbigu ku cadeeyeen in go’aanka gooni isku taaga Somaliland uu yahay go’aan shacab oo muqadas ah, oo aanay jirin cid gorgortan iyo wada hadal lagala gali Karin. Sidaa darted shacbiga Somaliland waxaan ugu baaqayaa sidii ay ugu dabaaldageen xuska 18ka may inay u ilaashadaan qaranimada iyo jiritaankooda, meelna uga soo wada jeestaan waxkasta oo xagal daacin kara qaranimada ku timid dhiigga loo huray halgankii qadhaadhaa ee dib loogu soo celiyay xornimada” Mujaahid Ibraahim Cabdillaahi Xuseen waxa uu intaa ku daray “Ninka moodaya in madaxbanaanida Somaliland ee ku timid dhiiga, in ciyaar lagu keenay waa nimaan habeena jirin, in wada hadal laga galaana waa xaaraan, maxaa yeelay aan wada hadalno waa aan heshiino”

Mujaahidka oo aanu wax ka waydiinay aragtidiisa la xidhiidha dhalinyarada Somaliland ee baryahan danbe dalalka shisheeye u tahriibaya, ayaa waxa uu yidhi “Dhalinyarada Somaliland ee shaqo la’aanta dalka ka tahriibayaa waa arrin aafo qaran ah, mana haboona in dhalinyarada Somaliland ay nafahooda u haligaan tahriibta dalalka shisheeye, waxana hada soo baxay arrimo dhaliilo leh oo dhalinyarada tahriibaysa kooxo ka ganacsada intay qoysaskooda la soo hadlaan si ay dhaqaale uga helaan ay yidhaahdaan Kalyihiibaa lagala baxayaa hadaan lacag loo soo dirin, waxaa la ii sheegay in nin hargeysa jooga wiilkiisu ka tahribay oo liibiya ku sugan ay niman ka ganacsada tahribtu tilifoon intay kula soo hadleen ay ku yidhaahdeen inankaagii kali baanu kala baxaynaa ee $5000 dollar soo dir si uu u badbaado, dabadeedna aabihii uu ku yidhi kala baxa anigana kalida labaad iiga saara oo lacagteeda ii soo dira dhaqaale aan usoo diro ma hayee nin biyoole ah ayaan ahaye, taasoo la sheegay in nimankii lacagta doonayay ay isla yaabeen. Hadaba waxaan ugu baaqayaa dhalinyaada tahriibaysa inay dalkooda ku samraan, mujaahidiintii SNM ee halgankii dalka ku naafoobay iyo kuwii ku agoomoobay iyo kuwii halganka dalka ku rajoobayba shaqo la’aanta way idinla qabaane dalkina ku samra”.

Haatuf.

Hargaysa (Togdhnews):- Col. Axmed Xasan Huudle, oo ah ninkii duubay filimii ka marag muujinta u ahaa gabood faladii iyo dambiyadii taliskii Siyaad Barre kula kacay shacbiga Somaliland isla markaana dunida tusay tacadiyada taliskii Afwayne kula kacay shacabka, ayaa shalay wargeyska Dawan uga waramay qaabkii uu filimkaasi u qaaday.

Filimkan uu Col. Huudle duubay ayaa si buuxda uu ugu soo bandhigay gabood faladii kala duwanaa ee ay xukuumada Siyaad Barre u gaysatay shacabka Somaliland Kaasi oo ay dunida ka qarin jireen isla markaana dagaaladii socday ay dunida ugu sheegi jireen in ciyaarihii gobolada dalka ay ka socdaan markii ciidamada SNM soo gashay magaalooyinka Hargeysa, Berbera iyo Burco.

Muuqaaladan Muj. Hudle ayaa sidoo kale waxay ka marag fureen dacwadii lagu oogay gagan ku dhiigle Maxamed Cali Samater, oo uu si cad u qirtay inuu amarka bixiyay ka dib markii la hordhigay muuqalada cadaynta u ah Muj. Axmed Xasan oo waraysi khaasa siiyay wargeyska DAWAN shalay isaga oo ku sugan gurigiisa magaalada Hargeysa, ayaa kaga waramay filimada ka marag kacay xasuuqii umadan dawladii afwayne kula kacday ee uu duubay xiliyadaasi.waxaanu waraysigii u dhacay sidan:

Su’aal: maxay ahayd u jeedada aad filimada uga duubtay dagaaladii 1988kii, imisa filim ayaad se ka duubtay dagaaladaas 1988kii?

Jawaab: markii ciidamadii aan qeyb watay magaalada Hargeysa aanu soo galnay, Afwayne waxa uu idaacadaha ka baahiyay in ciyaarihii gobolada ay Hargeysa ka socdaan oo kubad ku ciyaarayaan oo aanu dagaal jirin, dabadeetana si wixii loo ogaado oo aduunku u arko dulmiga Afwayne ku hayo ummada ayay arrintani ahayd, waagaasna may jirin adeegayadan casriga ah ee xagga Is-gaadhsiinta ee aynu hada haysano.

Su’aal: Cajaladihii aad duubtay aduunka magaadhsiisay, maxay ahaayeen muuqaaladii aad ku duubtay cajaladii hore, bal sawir naga sii?

Jawaab: cajaladii ugu horeysay ayaaba lagu ogaaday, waxaana ku duubnaa dagaalkii duyuuradihii oo rushaynaya shacabka madaafiicdii oo garaacaysa iyo ciidankii lugta oo SNM dagaal kula jira, iyo ciidamadii SNM oo dagaalamaysa, shacabkii oo oo qaxaya intuba way ku dhamaayeen, cajaladihii waxaan raaciyay dadkii qaxayay Itoobiya ayay gaadheen kadib sacuudiga Ingriiska saas ayay dunida ku gaadheen.

Su’aal: waa imisa cajaladaha aad ka duubtay dagaalkii 1988kii, kamarada aad wax ku duubaysay yaalahaa, xirfada sawir qaadida malahayd?

Jawaab: cajaladaha aan duubay waxay ahaayeen saddex, kamarada aan ku duubayay anigaa lahaa oo waxaan haystay Stereo ugu horeeyay laga furo magaalada Hargeysa Sahan Stereo, aqoon ayaan u lahaa sawir qaadida.
Su’aal: cajaladihii aad duubtay berigaa dagaalada wax ma ka haysaa hada?

Jawaab: maya, maxaa yeelay ujeedaii aan u duubay waxay ahayd in aduun waynaha lagaadhsiiyow wana lagaadhsiiyay, waxaana hada haya muwaadiniin reer Somaliland gaar ahaan kuwii dacweeyay Cali Samater ayaa maxkamada keenay oo tusay iyagoo cadaymo uga dhigaya dambiyada loo haysto ee gumaadka shacbi ah, Cali samatarna uu ku qirtay inuu amarka biixyay

Su’aal: waxaad sheegay in aad ahayd kornayl ciidanka cirka ah dawladii Soomaaliya, sidoo kale kornayl ka tirsan ciidamadii SNM mudadii Somaliland jirtayna dalka deganaa, marna dawladihii kala duwanaa ee Somaliland soo maray xil se ma ka qabatay?

Jawaab: maya dawladihii Somaliland u kala dambeeyay la’maan shaqayn xilna kama qaban, laakiin waa Alle mahadii mar hadaanu hadhsanayno midhihii halganka.

XIGASHO:WARGEYSKA DAWAN MEDIA GROUP

Masuuliyiinta ugu sarreeya shirkadda Yahoo ayaa Mr. David kula heshiiyey Sabtidii inay mareegtiisa caanka noqotay ka iibsadaan, taasoo ay booqdaan 100 milyan, sidoo kalena maalintii wax soo dhigaan 90 milyan oo qof, waxaannu ka helaa faa’iido lacageed oo dhan $1.1 bilyan doollar.

Heshiiska wiilkan oo ku nool magaalada New York uu la galay shirkadda Yahoo wuxuu ka dhigaya biyaneer, inkastoo la shaaciyey inuu arrinka ka yara biyo-diidsan yahay, laakiin wuxuu go’aansaday inuu faasaxo mareegtiisa oo uu sannadkii 2007 guriga hooyadii ku sameeyey.

Guddiga sare ee maamulka shirkadda Yahoo, ayaa la sheegay inay ansixiyeen Axaddii toddobaadkan iibsiga shabakadda Tumblr, waxana sannadkii hore dakhliga mareegtan galay ahaa $13 milyan oo dollar, halka lacagta u soo xarootayna gaadhay $125 milyan oo dollar.

Mareegtan cusub waxay aad u raalligelisay shirkadda Yahoo ee internetka caan ka ah, waxaanay ku hamiyeysaa inay ku iibsato qiimo kasta oo iibkeedu ku gaadho sida ay sheegeen madaxa guddida sare ee shirkadda Marissa Mayer.

Shabakadda Tumblr oo ah meel sawirrada, qoraallada iyo muqaallada lagu baahiyo, si fiicanna u shaqaysa, dad badanna ku xidhan yihiin, waxa uu wiilka sameeyey hore uga saaqiday waxbarashada, isla markaana baxay dugsigii uu dhiganayey markuu awoodi kari waayey fahamka duruustii iskuulka, balse waqtigan wuxuu ka mid noqday shaqsiyaadka ugu hantida badan.

Sidoo kale, mareegtani waxay la mid tahay barta Facebook ee dhallinyarada iyo waayeelka isticmaala tiknoolajigu aad ugu xidhmeen waayadan dambe.

“Saddexdii sanno ee ugu horreysay waxa jiray dad badan oo ku xidhmay mareegta, waxaanan helay hambalyo badan oo dadku igu leeyihiin waxaad tahay wiil aad u qurux badan oo isagoo da’yar dedaal gaadhay, hase ahaatee waqtiyadii ka horraysay wax dhiirigelin ah maan heli jirin,” ayuu yidhi Mr. David oo warraysi siiyey wargyeska Guardian sannadkii 2012.

Ibraahim Khadar Siciid

Togdheernews.com