Kulanka: Bayern Munich v Barcelona

Garoonka: Allainz Arena

Garsoore: Viktor Kassai‎

Waqtiga: 9:45 pm SGA (Saacada Geeska Afrika)

Waxaa caawa bilaabanaya semi-finalka koobka ugu xiisaha badan kubada cagta adduunka ee Champions League iyadoo lugta hore ee semi-finalka ee kulanka ugu soo horeeya ay Allainz Arena ku dhexmari doonto kooxaha ku kala guuleystay Champions League 4ta jeer ee Bayern Munich iyo Barcelona.

LINE-UPKA MACQUULKA AH:

Bayern Munich: Neuer; Lahm, Buyten, Dante,  Alaba; Martínez,  Schweinsteiger; Robben, Müller, Ribéry; Gómez

Barcelona:  Valdés; Alves, Piqué, Bartra, Alba; Xavi, Busquets, Iniesta; Pedro, Messi, Sánchez

Weeraryahanka kooxda Bayern Munich Mario Mandzukic ayaa seegi doona kulanka caawa ee Champions League ay la ciyaarayaan Barcelona isagoo ganaax ku maqan.

Philippe Lahm, Javi Martinez iyo Bastian Schweinsteiger ayaa dhamaantood la filayaa inay ku soo laabtaan line-upka kooxda ka db markii la nasasiiyay kulankii ay sabtidii 6-1 kaga badiyeen Hannover, laakiin ciyaaryahanada dhaawaca mudada dheer ku maqan Toni Kroos iyo Holger Badstuber ayaa ka maqnaan doona.

Lionel Messi ayaa isna niyad dhis fiican siiyay Barcelona ka dib markii uu ku soo laabtay tababarka buuxa ee kooxda isagoo seegay labadii kulan ee u danbeysay, laakiin ilaa iyo haatan si cad looma cadeyn inuu ku soo bilaaban karo kulanka caawa iyo in kale.

Daafacyada Carles Puyol iyo Mascherano ayaa dhaawac ku maqan, halka Adriano uu ganaax yahay, sidaasi darteed da’ yarka Marc Bartra ayay u badan tahay inuu daafac dhexe kala ciyaaro Gerard Pique.

• Bayern Munich ayaa badisay 18 kulan oo ka mid ah 19kii kulan ee u danbeysay tartamada oo dhan, guuldaradooda kaliya waa kulankii Arsenal ee lugta labaad ee wareega 16ka Champions League.

• Bayern Munich ayaa laga badiyay kaliya hal kulan 20kii kulan ee ugu danbeysay ee ay koox Isbaanish ah soo dhaweyso, 14 kulan waa ay badisay halka 5 kulan ay barbaro galeen.

• Bayern ayaa badisay seddex ka mid ah lixdii kulan ee ugu danbeysay ee ay Barcelona kula kulmaan tartan Yurub ah, labo kulan barbaro ayay galeen halka hal kulan laga badiyay.

• Barcelona ayaa badisay kaliya labo kulan oo ka mid ah sideedii kulan ee ugu danbeysay ee ay marti ahaayeen tartamada oo dhan, afar kulan barbaro ayay galeen halka labo kulan laga badiyay.

• Bluagrana ayaa sideed kulan oo isku xigta looga badinin carada Jarmalka taasoo soo jiitameysay tan iyo 2001dii. Rikoorkooda guud ee carada Jarmalka waa sagaal guul, 10 barbaro iyo shan guuldarro.

• Xavi ayaa dhameystiray 1,005 baas Champions League xilli ciyaareedkan, waana 470 baas in ka badan ciyaaryahan kasta, isagoo saxay 88 boqolkiiba.

Togdheernews.com

hamsedigaale@gmail.com

Xigasho Laacib.net

Warbixin – Keyse Axmed Digaale, weriyaha Jamhuuriya ee gobollada bariga Somaliland

Burco (Jam)- Sannad waliba waxa uu leeyahay dhacdooyin lagu xusuusto oo si gaar ah ugu suntan.

Haddaba, weriyaha Jamhuuriya ee gobollada bariga Somaliland Mr. Keyse Axmed Digaale, ayaa warbixin dheer ka diyaariyey dhacdooyinkii ugu muhiimsanaa sannadkii dhammaaday 2012 ee soo maray Gobolka Togdheer.

Warbixintan oo weriyuhu ku soo bandhigay dhacdooyin taariikhaysan oo ah kuwii ugu mudnaa ee soo maray Gobolka Togdheer sannadkii la soo dhaafay ee 2012 waxa uu ku bilaabay sidan:

“15 January 2012: Dagaal culus ayaa degaannada Buhoodle ku dhexmaray ciidanka qaranka Somaliland iyo malleeshiyo-beeleed degaankaas u dhashay, kaas oo sababay sababay khasaare isugu jiray dhimasho iyo dhaawac.

21January 2012: Madaxweynaha Somaliland ayaa Badhasaabka Gobolka Togdheer u magacaabay Mr. Cabdoo Axmed Aayar iyo ku-xigeenkiisa Maxamuud Axmed Yuusuf, kadib markii uu xilalkaas ka kala qaaday Md. Yaasiin Muxumed Cabdi iyo Cabdi Daahir.

22 January 2012: Shacabka ku dhaqan magaalada Burco ayaa isugu soo baxay bannaan ay ku taageerayaan qarannimada Jamhuuriyadda Somaliland.

25 January 2012: Koox dhakhaatiir ah oo u hoggaaminayey Dr Shiine oo ku takhasuusay qalliinnada indhaha, ayaa Cusbitaalka Manhal ee magaalada Burco ka bilaabay hawlgal qalliinno lacag la’aan ah indhaha loogu jeexay 155 qof, in ka badan shan boqol oo kelana loogu sameeyey daawayn iyo baadhitaanno caafimaad.

2 February 2012: Madaxwyne-ku-xigeenka Somaliland Md. Cabdiraxmaan Cabdillaahi Ismaaciil (Saylici), ayaa safar ku tegay Burco oo si weyn loogu soo dhoweeyey, waxaannu booqasho ku tegay Cusbitaalka Guud ee magaaladaas oo lagu daawaynayey askar ka tirsan ciidanka qaranka oo ku dhawacamay dagaallo waqtigaas ka dhacay duleedka degmada Buuhoodle, isagoo askari kastana guddoonsiiyey deeq lacageed.

Waxa kaloo Md. Saylici uu cusbitaalka booqday maxaabiis malleeshiyada Buuhoodle kaga dhaawacmay dagaalladaas.

25 February 2012: Wasiirka Arrimaha Gudaha Somaliland Md. Maxamed Nuur Carraale (Duur) oo ay wehelinayeen xildhibaan Maxamed Xaaji Yuusuf (Waabeeye) iyo masuuliyiin kale oo safar ku tegay Burco, ayaa baabuur casri ah ku wareejiyey taliska ciidanka booliska ee Gobolka Togdheer.

6 March 2012: Xidhiidhiyaha Qaramada Midoobay ee Gargaarka Bani’aadanimo Mr. Mark Bowden iyo wafti uu hogaaminayey ayaa safarkiisii labaad ku tegay magaalada Burco, waxaanay kormeer ku sameeyeen mashaariicda kala duwan ee hay’adaha UN-ku ka fuliyaan halkaas.

8 March 2012: Waxa si weyn looga xusay magaalada Burco munaasibadda maalinta caalamiga ah ee haweenka adduunka.

16 March 2012: Ciidanka Booliska Ismaamulka Soomaalida Itoobiya ee loo yaqaan Liyuu Boolis, ayaa 18 qof dad rayid ah oo u dhashay Somaliland ku laayay degaanka Raqda oo ka tirsan degmada Gaashaamo, halka shacabka magaaladaas oo dilkaas ka gadoodayna ay qudha ka jareen 11 askari oo ka tirsan Liyuu Booliska.

Waxa kaloo ay ciidankaasi maxaabiis ahaan u kaxaysteen dad xoolo-dhaqato ah oo tiradoodu gaadhayso ilaa 28 qof, balse waxa dadkaas lagu sii daayey kadib markii wadahadallo dhacdadaas ku saabsan magaalada Jigjiga ku dhexmareen Suldaan Maxamed Xirsi Qani iyo Madaxweynaha Kililka 5aad ee Itoobiya.

31 March12: Wefti ka socday Baanka Islaamka oo socdaal ku tegay magaalo-madaxda Gobolka Togdheer, ayaa booqday Jaamacadda Burco.

Dr. Dabar Cabdi Macallin oo horkacayey waftigaas ayaa saxaafadda u sheegay in socdaalkooda Burco la xidhiidho qiimayn Baanka Islaamku ku samaynayo jaamacadaha Somaliland, Maamul-goboleedka Puntland iyo Soomaaliya.

1 April 2012: Dagaallo culus ayaa markale degaannada Buuhoodle ku dhexmaray ciidammada qaranka Somaliland iyo malleeshiyooyinka degaankaas.

Dagaalladaas oo keenay dhimasho iyo dhaawac kala duwan waxay ciidammada qaranku ku qabqabteen maxaabiis tiradoodu gaadhayso ilaa 50 xubnood oo ka tirsanaa malleeshiyo-beeleedka reer Buuhoodle iyo baabuur tikniko ah, waxana maxaabiistaas lagu xidhay xabsiga dhexe ee magaalada Burco.

30 April 2012: Masuuliyiinta caafimaadka Gobolka Togdheer ayaa shir-jaraa’id kaga dhawaaqay in cudurka jadeecadu ka dillaacay gudaha iyo degaannada ku xeeran magaalada Burco, maalin kastana cusbitaalka la keeno dad xannuunkaasi soo ritay.

Isuduwaha Wasaaradda Cafimaadka Gobolka Togdheer Dr. Cabdi Yaasiin, ayaa sheegay in dad gaadhaya 300 qof uu ku dhacay cudurka jadeecadaha oo ay u jiifaan cusbitaalka Burco.

Bishii March ee sannadkaas cudurkaasi waxa uu dhawr carruur ku dilay tuulooyin ka tirsan degaannada Gobolka Saraar.

1 May2012: Ciidammada booliska, kuwa sida gaarka ah u tababaran ee SPU-da iyo millateriga, ayaa baajiyey mudaharaadyo ballaadhan oo Burco ka dhigi lahaayeen taageerayasha urur-siyaasadeedkii UDHIS, kaasoo ay kaga soo horjeedeen go’aankii Guddiga Diiwaangalintu ku sheegeen in ururkaasi ka hadhay ka qaybgalka tartanka doorashadii dawladaha hoose ee dalka ka qabsoontay 28 December 2012.

14 May 2012: Wakaaladda Biyaha Burco ayaa soo bandhigtay waxqabadkeeda iyo horumarka dhinaca biyaha ee ay gaadhay.

18 May 2012: Waxa si ballaadhan looga xusay Burco maalinta qarannimada Somaliland. Dadweynaha magaaladaas oo ku lebbisnaa calanka iyo astaanka qarankam ayaa subaxnimadii hore buux-dhaafiyey fagaaraha xarunta maamulka Gobolka Togdheer oo loo asteeyey munasibadda. Sidoo kale, ciidammada booliska, millateriga iyo ardayda dugsiyadam ayaa socod gaaddo-ka-ciyaara ku tegay fagaarahaas oo ay khudbado kala duwan uga jeediyeen Guddoomiyaha Golaha Wakiillada Somaliland Md, Cabdiraxmaan Cirro, xubno ka tirsan wasiirrada xukuumadda, xildhibaanno, maamulka gobolka, madax ka tirsan xisbiga KULMIYE.

21 May 2012: Waxa booqasho ku tegay Burco wefti uu horkacayo Safiir-ku-xigeenka Safaaradda dawladda Japan ku leedahay magaalada Nairobi ee xarunta dalka Kenya.

Safiirka Japan waxa socdaalkiisa ku wehelinayey sarkaalka hay’adda NRC u qaabilsan Somaliland iyo Soomaaliya, masuuliyiin sare oo ka tirsan hay’adda WFP iyo wakiilka xafiiska Somaliland ee hay’adda UNDP.

Safiir-ku-xigeenku waxa uu xadhigga ka jaray 50 guri oo laga hirgaliyey xaafadda Aadan Saleeban oo maalgelintooda bixisay dawladda Japan, fulintiisana iska kaashadeen hay’adda NRC iyo dawladda hoose ee Burco.

28 May 2012: Qorshaha istaraajiyadda waxbarasho ee jaamacadaha Somaliland shanta sanno ee socda oo lagu qabtay xarunta Jaamacadda Burco.

30 June 201: Ardayda fasallada 4aad iyo siddeedaad ee dugsiyada dhexe iyo sare ee Gobolka Togdheer, ayaa u fadhiistay imitixaankii shahaadiga ahaa oo ay guud ahaan ka qaybgaleen 2700 arday.

16 June 2012: Waxa Guddoomiyaha Jaamacadda Burco loo magacaabay Prof. Saleebaan Dirir oo noqday guddoomiyihii afraad ee jaamacaddaasi yeelato tan iyo markii la aasaasay sannadkii 2004.

Bishii July 2012: Waxa magaalada Burco ka furmay shirweyne lagaga hadlay tayaynata garsoorka iyo caddaaladda Somaliland oo ay ka qaybgaleen in ka badan koton xubnood oo isugu jiray guddoomiyayaasha maxakamdaha gobollada, garsoorayaal iyo xafiiska xeer-ilaalinta, kuwaasoo ka kala yimi lixda gobol ee dalka.

Kulankaas waxa furay Guddoomiyaha Maxkamdda Sare ee Somaliland, waxana goob-joog ka ahaa madax ka socday hay’adda UNDP oo maaglisay shirkaas.

4 August 2012: Wasiirka Duulista iyo Hawada Somaliland Md. Maxamuud Xaashi Cabdi oo ay weheliyeen xildhibaanno ka tirsan barlamaanka iyo masuuliyiinta Gobolka Togdheer, ayaa dhagax-dhigay dib-u-dhiska cusub ee ka socda madaarka Burco, iyagoo sidoo kalena lacag gaadhaysa $70 kun oo dollar ku wareejiyey Guddiga Dib-u-dhiska Madaarka.

6 August 2012: Hoggaamiyihii ururka SSC ee ka soo horjeeday Somaliland Dr. Saleebaan Xaglo-toosiya, ayaa lagu soo dhoweeyey magaalada Caynaba, kadib markii uu heshiis nabadeed la qaatay Xukuumadda Somaliland. Waxaana halkaasi ku soo dhaweyey Wasiiradda Daakhiliga, Maaliyadda, Madaxtooyadda iyo Gudoomiyaha xisbiga UCID, kadibna waxa hoggaamiyahaas loo galbiyey dhinaca magaalada Hargaysa, halkaas oo uu kulamo kala duwan kula yeeshay Madaxweynaha Somaliland.

12 August 2012: Wasiirka Dib-u-dejinta Somaliland Dr. Saleeban Xaglo-toosiye oo waqtigaas ahaa hoggaamiyaha jabhaddii SSC, ayaa gaadhay magaalada Burco, kadib markii ka soo kicitimay dhinaca caasimadda Hargeysa, isagoo horkacayey maxaabiis ciidammada qaranku ku qabqabteen dagaallo ka dhacay degaannada Buuhoodle iyo Sool oo lagu sii daayey cafis uu u fidiyey Madaxweyne Siilaanyo.

Dr. Xaglo-toosiye iyo maxaabiista la socday oo u sii jeeday dhinaca magaalada Buuhoodle, waxa sii galbiyey wasiirrada Daakhiliga, Madaxtooyada, Maaliyadda iyo Gaashandhigga Somaliland oo gaadhsiiyey ilaa duleedka degmada Qurilugud, iyadoo weftigaas si ballaadhan loogu soo dhoweeyey magaalooyinka Caynabo iyo Qurilugud.

19 August 2012: Dadweynaha ku dhaqan magaalada Burco ayaa u dareeray tukashada salaaddii Ciiddal-fidriga , kadib markii ay dhammaysteen soonka bisha barakaysan ee Ramadaan.

27August 2012:Dawladda Hoose ee Burco ayaa jidkii saddexaad oo laami ah ka hirgalisay magaaladaas, kaasoo dhererkiisu yahay 1km iyo dheeraad.

27August 2012: Abbaaro 5:00 galabnimo daybalo xooggan iyo siigo aan hore loo arag ayaa ku habsaday magaalada Burco, kuwaasoo sababay inay joogsadaan gebi ahaanba isu socodkii gaadiidka, sidoo kalena albaabada loo xidho goobaha ganacsiga, lana damiyo korontada magaaladaas.

Waxa kaloo dabaylahaasi ay qariyeen iftiinkii fallaadhaha cadceedda, dhulkuna wuxuu isu beddelay mugdi, iyaga oo shacabka reer Burco-na mar wada bilaabay duco Alle-bari, kadib markii cabsi iyo baqdin weyn ay soo foodsaartay. Haseyeeshee, 45 daqiiqo dabeed ayey go’day dabayshaas, waxana magaalada ka bilaabmay roob culus oo waqti kooban socday, waxaanay markii ugu horreysay taariikhda ee dabaylo noocaas oo kale ah hadheeyaan magaalada Burco.

28 August 2012: Madaxweyne-ku-xigeenka Somaliland Md. Cabdiraxmaan Cabdillaahi Ismaaciil (Saylici) oo ay weheliyaan wasiirrada Waxbarashada, Madaxtoyada, Ciyaaraha, xildhibaanno iyo masuuliyiin kale, ayaa ka qaybgalay xaflad loo sameeyey qallin-jabinta dufcaddii 2aad oo ka kooban 90 arday oo dhammaystay waxbarashada kulliyadaha kala duwan ee Jaamacadda Burco.

12 September 2012: Waxa magaalada Burco waxa lagaga dhawaaqay guddi ay ku midoobeen ganacsatad Gobolka Togdheer oo ka kooban 21 xubnood, kuwaasoo loo xilsaaray horumarinta iyo kobcinta ganacsatada Burco.

Isla dabayaaqadii bishii September ganacsatada Gobolka Togdheer ayaa kulan ballaadhan la yeeshay wefti ka socday Baanka Adduunka oo dalka ka waday qorshe kor loogu qaadayo laguna, kobcinayo ganacsiga gobolka, tallaabadaas oo baayacmushtarkuna si weyn u soo dhoweeyeen.

2 October 2012: Badhasabka Gobolka Togdheer Mr. Cabdoo Axmed Aayir, ayaa ka warbixiyey baaxadda khasaare ka dhashay roobab laxaad leh oo ka da’ay degaanno ka mid ah gobolka, waxaannu sheegay in roobabkaasi dileen xoolo gaadhaya dhawr kun oo neef, isla markaana baabiyen dhismayaal iyo guryo kala duwan, isagoo xusay in hal qof dumar ah ku dhimatay kadib markii daad qaaday.

7 October2012: Sayladda lagu kala iibsado xoolaha nool ee magaalada Burco waxa ka bilaabmay dhaqdhaqaaq xooggan oo ka dhashay mooshinkii Xajka oo xoolo aad u tiro badan loo diray dalka Sucuudi Carabiya.

Sayladda xoolaha ee Burco ayaa noqotay xilligaas mid xaami ah oo maalin kasta lagu kala iibsado xoolo nool oo tiradoodu gaadhayso siddeed kun oo neef adhi ah, iyadoo neefka la kala siisanayey lacag dhan $80 dollar, waxana iibka xoolaha ugu badnaa labada shirkadood ee Al-jaabiri iyo Indhadeero. Sidoo kale, gaadiid iyo dadweyne tiro badan ayaa shaqooyin ka helay.

26 October 2012: Waxay ku beegnayd munaasibaddii Ciidda Carrafo, waxana dadweynaha reer Burco tukashadii salaadda Ciiddal-adaxdaha kala qaybgalay Wasiirka Madaxtooyada iyo masuuliyiin kale oo ka tirsan xukuumadda.

29 October 2012: Tartankii ololaha doorashooyinka dawladaha hoose ayaa ka bilaabay degaannada Gobolka Togdheer, waxaanay toddobadii urur ee ka qaybgalay doorashada midkoodba maalin cududdiisa ku soo bandhigay fagaarayaasha muddo bil ah oo ololuhu socday.

10 November 2012: Wefti uu hoggaaminayey Madaxweyanaha Somaliland Md. Axmed Maxamed Maxamuud (Siilaanyo) ayaa socdaal ku tegay magaalada Burco e xarunta Gobolka Togdheer.

Md. Axmed-Siilaanyo waxa uu xadhigga ka jaray qaybo ka mid ah dugsigii hore ee Farsamada Gacanta ee Burco oo ay dib-u-dhis ku samaysay hay’adda UNDP. Sidoo kale, wuxuu furay jid laami ah, halka uu saddex kalena dhagax-dhigay, kuwaas oo ay dhammaantood hirgalinayso dawladda hoose ee Burco.

Waxa kaloo Madaxweynaha Siilaanyo uu dhagax-dhigay dhismayaal cusub oo lagu kordhinayo Qaybta Booliska Gobolka Togdheer iyo guriga martida ee Burco, halka uu furay qayb ka mid ah gurigaas oo dayactir lagu sameeyey.

Madaxweynaha iyo weftigiisa oo habeennimadii u hoyday Burco waxay subaxdii xigtay kormeer ku soo mareen garoonka diyaaraha oo ay ilaa hadda ka socoto hawl dib-u-dhis ah, xarunta caafimaadka iyo tayaynta xoolaha iyo Cusbitaalka Guud ee magaaladaas iyo weliba dhismaha jid laami ah oo isku xidhi doona Burco, Oodweyne iyo Hargaysa.

Sidoo kale, waxa uu isla maalintaas Madaxweynaha Somaliland furay dhismayaal cusub oo lagu kordhiyey dugsiyada sare ee Sheekh Bashiir iyo Sheekh Ibraahim ee magaalada Burco.

Madaxweyne Siilaanyo oo ay safarkiisa Burco ku wehelinayeen raxan ka tirsan golihiisa wasiirrada, waxa ay gelinkii dambe ee isla maalintaas dib ugu laabteen dhinaca caasimadda Hargeysa.

28 November 2012: Dadweynaha reer Burco iyo guud ahaan shacabka Somaliland ayaa u dareeray codbixintii doorashada dawladaha hoose ee dalka ka qabsoontay.

Golaha degaanka degmada Burco waxa ku tartamay 147 murrashax oo kala metelayey 7dii urur-siyaasadeed ee doorashada ka qaybgalay, waxaanay codbixintaasi waqtigii loogu talogalay ku dhammaatay si nabadgelyo ah.

5 December 2012: Komishanka Doorashooyinka ee Gobolka Togdheer, ayaa si rasmi ah ugu dhawaaqay natiijada codbixintii doorashada golaha degaanka ee Burco iyo magacyada 21-ka xildhibaan ee ku guulaystay.

11 December 2012: Maxkamadda Gobolka Togdheer waxay dhaarisay 21-ka xildhibaan ee loo doortay golaha degaanka Burco.

15 December 2012: Golaha cusub ee degaanka Burco ayaa yeeshay fadhigoodii ugu horreeyey oo ay xilka maayarnimo ugu doorteen Md. Maxamed Yuusuf Muraad, ku-xigeenkiisana Md. Muxumed Xasan Xoday.

19 December.2012: Wasiirka Xannaanada Xoolaha Somaliland Dr. Cabdi Aw Daahir, ayaa xadhigga ka jaray xarunta caafimadka iyo tayaynta xoolaha oo ku taal duleedka magaalada Burco.

Xafladdii furitaanka xaruntaas waxa joogay Wasiirka Ganacsiga, Wasiiru-dawlaha Maaliyadda, xildhibaanno, madaxda degmada Burco iyo marti-sharaf kale oo tiro badan.

Masuuliyiinta xarunta caafimaadka iyo tayeynta xoolaha nool oo munaasibaddaas ka hadlay, ayaa sheegay in xaruntoodu leedahay shaybadh casri ah, qaadkeeduna dhan yahay in ka badan 240 kun neef oo isugu jira geel, lo’ iyo adhi, waxana fursado shaqo ka helay in ka badan 2000 qof.

20 December 2012: Maayirka cusub ee la doortay degmada Burco ayaa si rasmi ah xilka ugala wareegay maayirkii hore oo ku wareejiyey lacag  gaadhaysa ilaa toddobada boqol oo milyan shillinka Somaliland ah, iyadoo sidoo kalena munaasibaddaas lagu soo bandhigay waxqabadka maayirkii hore muddadii uu xilka hayey.

Xil-wareejintaas waxa ka qaybgalay masuuliyiin ka kala socday xukuumadda, maamulka Gobolka Togdheer iyo dadweynenaha Burco.

Warbixin – Keyse Axmed Digaale

Sida ilo-wareedyo xogogaal ah Togdheernews.com u xaqiijiyeen, fadhi ay golaha cusub ee degmada Burco yeesheen Khamiistii toddobaadkan oo saxaafaddu dibadda ka joogtay, waxa xildhibaannadu ku ansxiyeen miisaanyadda dawladda hoose, iyadoo 19 mudane oo fadhigaas ka qaybgalay dood adag ka yeesheen markii xubnaha golaha cusub fadhiga soo hordheen in miisaaniyadda lagu daro korodhiisimada gunnooyinka ay qaataan, balse waxa arrintaas ganafka ku dhuftay oo si adag uga horyimi Maayir Maxmed Yuusuf Muraad iyo ku-xigeenkiisa Muxumed Xasan Xoday, kuwaas oo sheegay in aan waqtigan loo baahnayn korodhiisimo gunno, laakiin golaha looga baahan yahay waxqabad.

Waxa kale oo masuuliyiintani si cad u tilmaamayeen in culayska la saaro oo miisaaniyaddu loo badiyo dhinaca mashaaricada horumarinta.

Haseyeeshee, doodda miisaaniyadda oo ahayd mid adag oo xildhibaannadu isku mari waayeen, isla markaana socotay ilaa 3:00 galabnimo ee maalintaas, ugu dambayn waxay mudanayaashu ku duduuceen maayirka iyo ku-xigeenkiisu inay aqbalaan dalabkooda ku wajahan korodhsiimada gunnooyinkooda, sidaasna waxa lagu ansixiyey miisaaniyad-sannadeedka dawladda hoose ee Burco oo dhan 12,042,593,060 (laba iyo toban bilyan, laba iyo afartan milyan iyo shan boqol, shagaashan iyo saddex iyo lixdan kun) shillinka Somaliland ah, taasoo 10,854,600 ka badan miisaaniyaddii sannadkii dhammaaday ee 2012.

Kordhsiimada gunnooyinka xildhibaannada cusub samaysteen waxay dhan tahay 33%, halka shaqaalaha dawladda hoosena 20%loo kordhiyey mushaharooyinka.

Inkastoo miisaaniyadda golaha degaanka ansixiyey ka muuqdaan mashaariic waaweyn dhinaca horumarka ah, haddana xildhibaannada cusub ee degaanka Burco, ayaa noqonaya kuwii ugu horreeyey ee korodhsada gunnada ay qaataan.

Togdheernews.com

Burco/Office

Ceerigaabo (Togdhnews)- Guddiga iyo TALO iyo TAWFIIQ ee beelaha Galbeedka Burco oo maalmihi  u dambayeey ku sugnaa magaalada Ceerigaabo ee xarunta Gobolka Sanaag, ayaa  shir-jaraa'id oo ay halkaas ku qabteen shalay, waxay xukuumadda Somaliland  ugu baaqeen  inay ka  digtoonaato  wax-ka-beddel  lagu sameeyo nidaamkii  saami-qaybsiga  beelaha ee Gobolka Togdheer.

Sidoo   kale,  waxay  ka hadleen  habkii  ay  u dhacday  dalka  doorashadii  degaannadu   iyo  arrimo  kale.

“Dalka waxa ka dhacday doorashooyinkii degaanka oo muddadii loo qabtay ku qabsoomay laakiin maxaa ka soo baxay, waxay dawlada Somaliland si badheedha oo musuqmaasuq iyo boob baahsan oo dalka oo dhan ku baahsan oon xishood lahayn ku samaysay doorashadii dalka ka dhacday ee golayaasha degaanka. Waxyaabaha dalka oo dhan saameeyey waxa ka mid ah in dawladdu la timi sanaaduuq dheerada oo ka siyaado ah sanaaduuqdii komishanka, isla markaan gaystay goobo aan loogu talogalin in doorasho ka dhaco. Sidoo kale, ciidammada qaranka oo dadka u dhexeeya, kana masuul ah ammaanka dalka lagu khasbay in ay codeeyaan oo waliba xisbiga xukuumadda u codeeyaan.” Sidaa waxa yidhi Guddoomiyaha Guddiga Talwo iyo Tawfiiq Mr. Xasan Xuseen Faarax.

Sidoo kale, waxa uu ka hadlay saami-qaybsiga beelaha ee Gobolka Togdheer, isagoo  xukuumadda   uga digay  inaanay  ka weecan  qaabkii hore ee beelaha gobolkaasi wax u qaybsan jireen.

“Togdheer waxay lahayd dhaqan  iyo sunne  la raaco  oo ay wax ku qaybsato,  kaasoo  xukuumad kastaa  raaci jirtay,  maadaama Burco tahay goob xaasaasi ah. Maanta reerka leh Badhasaabnimada waa la garanayaa, reerkiina waa u taagan yahay oo waa sugayaa, sidaa daraadeed xukuumaddu waa in ay si degdeg ah ugu soo magacawdaa badhasaabkii gobolka."

Waxa kaloo uu Gudoomiyuhu ka digay cawaaqib-xumada ka dhalan karta haddii wax laga bedelo habkii saami-qaybsiga beelaha Togdheer, taasoo uu sheegay inay keeni karto dhibaatooyin badan oo ay masuuliyadooda xukuumaddu tunka u ridan doonto.

Mujaahid Ibraahim Jaamac oo ka mid ah xubnaha Guddiga Talo iyo Tawfiiq, ayaa isaguna sheegay in xukuumadda looga baahan yahay inay derajada ciidammada ee ay dhowaan ballanqaaday in loo qaybiyo si caddaalad ah.

"Xukuumadda Somaliland waxaan u sheegayna in arrinta derajada ciidammada ee la doonaayo in la siiyo ciidamada waa inay noqoto mid ay isku dheellitiran yihiiin beeluhu amma nidaam ay ka wada raalli yihiin lagu bixiyo, haddii kale waxay noqon doontaa mid dhibteeda leh oo khalkhal galin karta amaanka dalka,” ayuu yidhi Ibraahim Jaamac.

TogdheerNews..Ceerigaabo

Hargaysa (Togdhnews)- Madaxweynaha  Somaliland Md.Axamed Maxamed Siilaanyo ,ayaa warsaaxafeed uu soo saaray goor dhaweyd ku sheegay inuu xilkii ka qaaday Badhsaabkii  Gobolka Saaxail Maxamuud Cali Saleebaan(Ramaax) ,islamarkaana  u magacaabay Cali Maxamed Cilmi, Sidoo kale waxa Warsaxaafadeedkan  lagu sheegay in Xamarji  mar kale loo magacaabay  Badhasaabka Maroodi Jeex.

Badhasaabka Saaxil Mr.Ramaax  ayaa wararku sheegayaan inay galaafatay  ka dib markii uu Xukuumada iyo Xisbigiisu ay guuldaro xumi  ka raacday ololihii ugu weynaa ee ay u galeen ,sidii maayir ku xigeenka Berbera  looga dhigi lahaa nin ka soo jeeda beesha Bariga Burco ,balse ay ku hungoobeen.

waxa Kale oo wararka caawa ka imanayaa magaalo xeebeedka Berbera ,ayaa tilmaamaya in ciidanka loo yaqaan RRU , oo wata gaadiid badan ay caawa gaadheen magaaladaasi, kuwaasoo la sheegay inay isku xeereen Xarunta Dawlada Hoose Berbera, Xaruntii Gobolka, iyo afeefka hore ee dekada.

geesta Kale , waxa kacsan xiisada magaaladaasi, waxaana ka bilaabmay shirar hoose oo lagag arinsanayo arimahan soo kordhay.

TogdheerNews..Hargaysa.

Kulanka lagu doortay maayirka iyo maayir-ku-xigeenka magaalada Berbera oo ka dhacay xarunta maamulka gobolka Saaxil, waxa hadheeyey buuq iyo qaylo ka dhashay isku dayday wasiir-ku-xigeenka Amniga ee Wasaaradda Arrimaha Gudaha Md. Cabdillaahi Abokor Cismaan ku doonayey in fadhiga golaha dib loo dhigo si aanay wax doorasho ahi u dhicin, balse waxa qorshahaas gaashaanka ku dhuftay Badhasaabka Gobolka Saaxil Md. Maxamuud Cali Saleebaan (Ramaax) oo ku adkaystay in kulanku qabsoomo, lana doorto maayir iyo maayir-ku-xigeenka Berbera oo ka soo kala baxay xisbiga UCID iyo Urur-siyaasadeedka WADDANI.

Sida uu ku soo waramay suxufi Jamhuuriya ka tirsan oo ku sugnaa goobta golaha degaanka Berbera fadhiga ku yeeshay, waxa kulankaas oo uu guddoominayey Badhasaabka gobolka Saaxil Maxamuud Cali Saleebaan (Ramaax) ka xaadiray 12 xildhibaan oo ka mid ah 21-ka golaha degaanka Berbera ka kooban yahay, kuwaasoo cod gacan-taag ah ku doortay  maayirka magaalada Berbera, ahna guddoomiyaha golaha degaanka Md. Cabdishakuur Maxamed Xasan (Cabdishakuur-cidin) oo ka soo baxay xisbiga UCID, halka ay sidaas oo kalena u doorteen Md. Baashe Cabdillaahi Ibraahim (Yacquub) oo ka soo baxay urur-siyaasadeedka WADDANI inuu noqdo maayir-ku-xigeenka Berbera.

Go’aanka golaha degaanka magaalada Berbera oo ah dekedda laf-dhabarta u ah dhaqaalaha dalku ku doorteen maayirka iyo maayir-ku-xigeenka, ayaa weji-gabax fool-xun ku noqday xukuumadda talada haysa iyo xisbigeeda KULMIYE, kuwaasoo geed dheer iyo mid gaabanba u fuulay sidii loo dooran lahaa maayir iyo maayir-ku-xigeen ay wataan, iyagoo si gaar ah u danaynayey in maayir-ku-xigeenka Berbera loo doorto xildhibaan ka soo jeeda beesha bariga Burco (Habar-jeclo), iyadoo qorshahaas oo ilaa madaxtooyada is-daba taxnaa guul-daraystay markii maayir-ku-xigeenka shalay loo doortay xildhibaan Baashe Cabdillaahi Ibraahim (Yacquub) oo ka soo jeeda beesha galbeedka Burco, kana soo baxay ururka WADDANI.

Xukuumadda oo uu wakiil ka ahaa wasiir-ku-xigeenka Amniga ee Wasaaradda Arrimaha Gudaha Md. Cabdillaahi Abokor Cismaan, ayaa olole ugu jirtay sidii dib loogu dhigi lahaa fadhiga golaha degaanka Berbera shalay yeeshay ee lagu doortay maayirka iyo ku-xigeenka, kuwaasoo qorsheeyey in fadhigaas dib loogu riixo ilaa maalinta Axadda si ay fursad ugu helaan inay kala jabiyaan xildhibaannada golaha degaanka Berbera ee qorshahooda ka soo horjeeda, isla markaana tiro aqlabiyad ah uga raadsadaan xildhibaannada si maayirka iyo ku-xigeenkiisa loogu doorto xubnaha ay sida gaarka ah u danaynayeen.

Hasayeeshee, waxa qorshahaas fashiliyey Badhasaabka Gobolka Saaxil Md. Maxamuud Cali Saleebaan (Ramaax), isagoo go’aansaday in fadhiga golaha degaanku qabsoomo, isla markaana la doorto maayirka iyo maayir-ku-xigeenka, arrintaas oo sababtay inay is khilaafeen badhasaabka iyo wasiir-ku-xigeenka amniga ee wasaaradda daakhiliga oo dedaal ugu jiray in aanay saxaafaddu waxba ka duubin kulanka lagu doortay guddoomiyaha iyo guddoomiye-ku-xigeenka golaha degaanka Berbera, isla markaana gabi ahaanba fadhigaas dib loogu riixo Axadda toddobaadkan.

Wasiir-ku-xigeenka Amniga ee Wasaarada Arrimaha Gudaha, waxa uu goobta ka sheegay in sagu leeyahay amarka askarta ammaanka ku sugaysay ku shaqaynayso, isagoo ciidanka ku wargeliyey in aanay saxaafadda u ogolaan inay gudaha u galaan hoolka doorashadu ka dhacday, balse Badhasaabka Gobolka Saaxil Maxamuud Cali Saleebaan (Ramaax), ayaa wasiir-ku-xigeenka ku wargeliyey inuu yahay madaxweynaha gobolka, sidaa darteedna amarkiisa oo qudhi shaqaynayo, waxaannu amray in saxaafaddu gudaha u gasho hoolka xildhibaannada golaha degaanku ku doorteen maayirka iyo ku-xigeenka ay xukuumaddu sida xooggan uga soo horjeeday.

Dhinaca kale, maayarkii hore ee magaalada Berbera Md. Cabdale Maxamed Carab (Sandheere) oo isagu hore uga tanaasulay inuu u tartamo maayarnimada Berbera, kana mid ahaa xildhibaannadii doortay maayirka iyo maayir-ku-xigeenka cusub, ayaa xukuumadda ugu baaqay inay farogelinta ka dayso golaha degaanka Berbera.

"Waxaan xukuumadda leeyahay idinkuba kursiga doorashaad ku timaadeen ee faro-gelinta ha laga daayo golaha deegaanka Berbera,” ayuu yidhi Md. Cabdalle Maxamed Carab oo shalay saxaafadda kula hadlay hoolkii lagu doortay maayirka iyo maayir-ku-xigeenka Berbera.

Waxa maayirkii hore ee magaalada Berbera sheegay inuu aad ugu faraxsan yahay doorashada maayirka iyo maayir-ku-xigeenka cusub, isagoo ballanqaaday si wanaagsan ula shaqayn doono xubnaha la doortay, isagoo arrintaas ka hadlayeyna waxa uu yidhi;

"Waxaannu aad ugu faraxsanahay 10 sannadood dabadeed in aanu maanta (shalay) halkan ku doorano dhallinyaro cusub ee la soo doortay Cabdishakuur Cidin iyo Baashe Cabdillaahi Ibraahim (Yacquub), waxaannu ugu bushaaraynaynaa dadweynaha ku dhaqan Gobolka Saaxil inaanu si wanaagsan ula shaqaynayno, xil wareejin wanaagsan aannu u samaynayno, waxaanan u rajaynayaa guul."

 xigasho jamhuuriya

Xafldan xilka  lagula kala  wareegayay oo ay ka gaybgaleen Maamulka  gobolka,  Wasiiru–dalaha Maaliyadda, Guddiga  horumarinta,  guddoomiyaha Jaamacadda Burco, Xildhibaannadda cusub, qaarka mid ah hay’adaha samafalka  caalamiga iyo kuwa wadaniga ah iyo dadweyne badan ayaa lagu qabtay  hoolka  shirarka Dawlada Hoose.

 Maayirkii  hore  ee degmada  Burco  ee  isagu xilka wareejinayay  Md. Maxamuud  Dhegalaab  oo warbixin dheer ka jeediyey   xafladaas, ayaa ka xogwaramay heerarkii kala duwanaa  ee ay soo martay dawladda  hoose, isagoo xusay in markii  uu  xilka  qabanayey  la wareegay dayn badan, shaqaalaha  oo  mushahar  qaadan  13-bilood,  gaadiidka  oo fadhiya,  balse  hadda aanay jir  wax dayn ah oo uu wareejiyey.

 “Waxaa   ii sharaf ah maanta (shalay) in aan wareejiyo hanti dhaqaale oo dhan 707,357, 792.SLSH (toddoba boqol iyo toddoba milyan, saddex boqol, konton iyo toddoba kun, toddoba boqol, laba iyo sagaan shillinka Somaliland ah) iyo $2,840 dollar. Waxaan wareejinayaa shaqaale   dhan 341 oo  aan wax dayn ah  lahayn, marka laga reebo mushaharkii bishan  socota, waxaan wareejinayaa    gaadiid wada shaqaynaya  oo leh  hoostadiisii,  dhammaan waaxyaha  dawladda hoose  oo xafiisyadoodu  wada qalabaysan  yihiin, kuna shaqeeya qalab casri ah, waxaan wareejinyaa  qaybta xisaabaadka dawladda  hoose  oo ku shaqeeya  nidaam xisaabeed casri  ah  oo aad si fudud u  heli  karto xisaabtii bil kasta, sannad kasta  iyo maalin kasta, waxaana  arrintan  naga caawisay   oo uga mahadcelinyaa hay’adda Habitat oo maanta  goob-joog  ka ah xafladan,” ayuu yidhi maayirkii hore ee Burco, isagoo intaas ku daray  in  muddo ka badan soddon sanno iyo dheeraad  markii  u horreysay   magaalada   Burco  ka hirgalinay  afar  jid oo  laami ah, saddex kalena  gacanta  lagu hayo, isla markaana ay farxad u tahay inuu meesha ka saaray wixii loo yaqaanay ku qabso ku qadi mayside.

 Waxa  maayirkii hore  tilmaamay inay   dakhliga soo  gala dawladda hoose  5% ku kabi  jirnay  Jaamacada Burco  iyo cisbitaalka, halka  ay ciidanka  booliska  ka caawin jireen shiidalka  iyo  dhinca  qoraalada.

 Maayirka  cusub ee degmada Burco  Sheekh Maxamed  Yuusuf  Muraad  oo xafladas ka  hadlay, ayaa  sheegay  inay halkooda ka sii qaadi doonaan  waxqabadka  ay ugu yimaadeen  dawladda hoose, isagoo arrintaas ka hadlayeyna waxa uu yidhi; “Waxaan idiin  sheegayaa  inaan ka sii horumarin doono  halka maanta la  soo gaadhsiiyay,  ballanqaadi doonana  inay   hantida qaranka naga  nabadgasho.”

 Waxa maayirka cusubi ka codsaday bulshadda reer Burco inay  la shaqeeyan oo  gacan siiyaan; isagoo carrabka ku dhuftay inuu ku faraxsan yahay in maayirkii  hore  ka mid yahay golaha  degaanka  cusub ee la soo doortay, isla markaana  ka dhigan   doono  la taliye, kana faa’iidaysan doono waayo-aragnimadiisa.

 Badhasaabka Togdheer Md.  Cabdoo Axmed Aayir oo isna xafladaas xil-wareejinta ka hadlay, waxa uu maayirkii hore ku hambalyeey waxqabadka uu   soo bandhigay, kuwa cusubna ku booriyay    inay halkaas ka sii wadaan waxqabadka maayirkii hore ka tagay.

 “Waa u guul    aan  la inkiri karayn mar haddii  golihii  soo bandhigeen waxqabadkoodii  oo  aynu  ka markhaati  ka  cayno, oo hanti  ka badan ilaa toddob a boqol oo milyan   ay maanta   wareejinayaan oo  aanay ka   tagayn wax dayn ah,  ammaan   ayey  ku mudan yihiin, waan  u guul,” ayuu yidhi Badhasaabka gobolka Togdheer.

 Wasiirul-dawlaha  wasaarada maaliyada  Somaliland  Cismaan Cabdillaahi Saxardiid, ayaa  sheegay  in hantida  uu wareejiyay maayirkii hore ay ka  sii mudan tahay  habka  iyo  hannaanka  uu wareejiyay oo  rajaynayo   in tariikhdu xusi doonto.

 Sidoo  kale   Xoghayaha   fulinta  dawladda  hoose ee magaalada Burco   Cali  Cabdi Xirsi ayaa ka warbixiyey hawlaha  shaqo ee Dawladda hoose,  islamarkaana sheegay inay gacmo furan ku soo dhaweynayaan maamulka  cusub  ee la doortay iyo xubnaha degaankaba, waxaannu ballanqaaday  inay  si daacad  ah ula shqeyn doonaan.

 Mr. Cabdiraxmaan  Maxamuud  oo  ka mid ah  sarakiisha  hay’adda Habitat , ayaa  uga  mahadceliyay maayirkii  hore  degmada  Burco wada shqaynta  wacan  ee ka dhaxaysay, kuna ammaanay  kaalinta  uu ku  lahaa horumarka   iyo  waxqabadka   Burco.

Xaflada xil-wareejinta oo  ahayd  mid si weyn loo agaasimay, waxa  ka hadlay  Maayir-ku-  xigeenka cusub ee degmada Burco  Muxumed  Xasan  Xoday,  Mayir-ku-xigeenkii  hore Axmed  Cabdi  Falay, Maxamuud  Diiriye  Xayd (Dibjir), guddoomiyaha Gudiga  horumarinta   Togdheer, Maxamuud  Aadan Dheri, Guddoomiyaha  Jaamacaadda  Burco Prof. Saleebaan Dirir  iyo Badhasaabka  gobolka Saraar Sheekh  Cali  Warsame   iyo   xubno  kale , kuwaas  oo soo dhaweyey  tallaabadan, waxqabad ee uu muujiyay  duqii  hore ee degmada Burco.

Gabagabadii   xafladan waxa   wasiirul-dawlaha maaliyaddu   shahaadooyin   guddoonsiiyey   badhasaabka gobolka   Togdheer, taliyaha booliska gobolka, Maayirkii hore ee degmadda, kuwaasoo ay   soo diyaariyeen   xildhibaannadda golaha degaanka ee cusub.

Waxa kaloo  shahaadooyin   la   guddoonsiiyey   xubnaha shaqaalaha   dawladda   hoose, xildhibaanno,   waxgarad, Wargayska Jamhiiriya Media Group, Telifishanka  Caalamiga ah  HCTV   iyo  qaar  ka mid  ah  saxaafaadda  gobolka Togdheer, shirkaddaha   Dahab shiil, Telesom, Kaah,  Beder  iyo  kuwo kale.

 Waxa  munaasibaadsi  lagu  soo bandhigay  muuqal sawiro  ah  oo muujinaya  waxqabadkii  dawladda hoose  Burco mudadii  uu xilka hayay   maayirkan  xilka wareejiyey.

Togdheernews.com

 
Berbera 19 Dec 2012 (Togdhnews)- Mudanayaasha cusub ee dhawaan loo doortay Golaha Degaanka Berbera, ayaa maanta doortay maayar iyo maayar-ku-xigeen lagaga adkaaday xisbul-xaakimka KULMIYE oo xisbi ahaan ugu tiro badnaa xildhibaannada ka soo baxay degmadaasi.

Fadhi buuq dhaliyey oo maanta xildhibaannadu ku yeesheen xarunta dawladda hoose ee Berbera, ayaa a Maayarka Berbera loogu doortay Cabdishakuur Maxamuud Xasan (Cidin) oo ka soo baxay xisbiga UCID, halka Maayar-ku-xigeen loo doortay Baashe Cabdillaahi Ibraahim (Yacquub) oo isna ka soo baxay ururka Waddani.

Haseyeeshee, waxa fadhiga hadheeyey buuq ka dhashay loollan dhexmaray Badhasaabka Gobolka Saaxil Mr. Ramaax oo doonayey inuu fadhigu qabsoomo oo uu maamulo iyo Wasiiru-dawlaha dhinaca ammaanka ee Wasaaradda Dakhaaliga Cabdillaahi Abokor oo isna damacsanaa inuu baajiyo fadhiga, maadaama qorshe xukuumaddu ku doonaysay in cid ay wadato lagu doorto lagaga awood badnaa.

Dhinaca kale, Maayarkii hore ee Degmadda Berbera Cabdale Maxamed Carab (Cabdale-sandheere), kana mid ah mudanayaasha cusub ee dib loo soo doortay oo markii fadhigu dhammaaday la hadlay warbaahinta ayaa Xukuumadda Madaxweyne Siilaanyo ugu baaqay inay farogelinta ka joojiso Golaha Deegaanka Berbera.

“Waxaanu aad ugu faraxsanahay 10 sanadood dabadeed in aanu maanta halkan ku doorano Dhalinyaro cusub ee la soo doortay Cabdishakuur Cidin iyo Baashe Cabdilaahi Ibraahim (Yacquub). Waxaan-se xukuumadda leeyahay idinkuba kursiga doorashaad ku timaadeen farogelinta ha laga daayo Golaha Deegaanka,” ayuu yidhi Maayar Cabdalle.

TogdheerNews..Berbera.

 Salaadiinta waaweyn ee beelaha Subeer Awal iyo Garxajis oo ay wehelinayaan siyaasiyiin iyo xildhibaanno Baarlamanka ah, ayaa shirar xasaasi ah oo aan ujeeddadooda la shaacin shalay ilaa xalay ku yeeshay magaalada Berbera ee xarunta Gobolka Saaxil.

Salaadiinta guud ee beelaha Ciidagale, Habar/yoonis iyo Subeer Awal, salaadiin kale, siyaasiyiin iyo xildhibaanno ka tirsan Golaha Wakiillada oo ku abtirsada mucaaradka, ayaa kulan-qayilaadeed albaabadu u xidhnaayeen ku yeeshay gelinkii dambe ee shalay hudheelka Cabdillaahi Gamadiid ee magaalada Berbera, halkaas oo ay tan xalay cawayskii ku gorfaynayeen arrimo aan ubacdooda ilaa hadda la dooxin.

Kulankaas waxa ka qaybgalay salaadiinta guud ee beelaha Subeer Awal, Habar/yooni iyo Ciidagale – Suldaan Xasan Suldaan Cabdillaahi, Suldaan Maxamed Suldaan Xirsi Qani iyo Suldaan Maxamed Suldaan Cabdulqaadir – Suldaan Maxamuud Axmed Sheekh, Suldaan Nuur Faarax, siyaasiga mucaaradka ah ee Muj. Ibraahim Cabdillaahi Xuseen (Dhagaweyne), xildhibaan Axmed Xasan Waysa-cadde iyo xubno kale.

Ilaa hadda si cad looma oga waxyaabaha lagaga wadahadlay kulankaas oo saacado badan socday, balse waxa ku gedaannaa dareenno xasaasi ah oo ku saabsan ujeeddooyinka ka dambeeya shirar-doceeyda xilligan u bilaabmay madaxda sare ee dhaqanka laba ka mid ah beelaha ugu waaweyn Somaliland.

Weriye Jamhuuriya ka tirsan oo socdaal ku jooga Berbera oo hudheelka shirku ka socday kulmay salaadiintaas miisaanka leh, waxna ka weydiiyey nuxurka iyo ujeeddada kulankooda, ayaa gebi ahaanba afka ka xidhay inay tafaasiil ah ka bixiyaan ajendayaasha shirkooda iyo waxyaabaha ay kaga arrinsanayaan, hase ahaatee waxay ku gaabsadeen inay ka wadahadlayaan arrimo la xidhiidha danaha beelaha ay metelaan iyo xaaladda guud ee dalka.

Haseyeeshee, ilo-wareedyo ku dhodhow kulanka Berbera ku dhexmaray salaadiinta beelaha Awal iyo Garxajis, ayaa tibaaxay in fadhiga qayilaadda ah ee madax-dhaqameedyadu isugu yimaaddeen uu daarranaa arrimo siyaasadeed oo salka ku haya doorashadii dawladaha hoose ee dhowaan dalka qabsoomay iyo natiijooyinka ka soo baxay doorashadaas ee qalalaaseyaasha ilaa hadda taagan ka dhaliyey caasimadda Hargeysa iyo weliba loollan adag oo loogu jiro xilka Maayar-ku-xigeenka Berbera.

Waxa kale oo ilahaasi xuseen, in salaadiinta iyo siyaasiyiinta wehelinayey ay doodo adag ka yeesheen qodob xasaasi ah oo ku saabsan kursiga rabshaduhu weli ka taagan yihiin ee xildhibaanka ka soo jeeda beesha Bariga Burco uu urur-siyaasadeedka RAYS ugu soo baxay golaha degaanka cusub ee Hargeysa, arrintaas oo ilo-wareedyadu tilmaameen ay madax-dhaqameedyadaasi aad uga biyo-diidsan yihiin iyo weliba olole xooggan oo isla beeshaasi ugu jirto inay ku fadhiisato kursiga Maayar-ku-xigeenka Berbera, maadaama ay shan xildhibaan ku yeesheen golaha cusub ee degaanka Berbera, iyadoo kursigaasi uu 21-kii sannadood ee Somaliland gacanta ugu jiray beel ka tirsan beelaha Galbeedka Burco oo deggan Gobolka Saaxil.

Geesta kale, kulamo kale oo ujeeddadooda lala xidhiidhinayo loollan xooggan oo loogu jiro labada kursi ee ugu mudan ee golaha degaanka Berbera, ayaa koox kale oo salaadiin ah iyo wasiirro xukuumadda ka tirsan ka yeesheen shir isla gelinkii dambe ee shalay ka dhacay hudheelka Maansoor ee magaalada Berbera.

Inkastoo aan xogo rasmi ah laga hayn waxyaabaha lagaga hadlay shir-doceedyadaas oo ilaa xalay socday iyo natiijo ka soo baxda toona, haddana sida ilo-wareedyadu bidhaamiyeen in kulankaas oo uu abaabulkiisa gadhwadeen ka yihiin Wasiirka Madaxtooyada Somaliland Md. Xirsi Cali Xaaji Xasan iyo masuuliyiinta dawladda ee Gobolka Saaxil uu qayb ka yahay loollanno aad u adag oo loogu baratamo xilalka Maayarka iyo Maayar-ku-xigeenka Berbera, waxana guud ahaan magaaladaas hadheeyey dhaqdhaqaaqyada lagu kala riixanayo labadaas kursi oo dhinacyo kala duwan dhex yaalla.

Dhaqdhaqaayada kulamada Wasiir Xirsi dabada ka riixayo ee ka socda Berbera, ayaa farta lagu fiiqay in dulucda biyo-dhacoodu tahay sidii beesha Bariga Burco u xalaashan lahayd kursiga Maayar-ku-xigeenka Berbera, isla markaana ugu fadhiisan lahaa mid ka mid ah shanta xildhibaan ee ku abtirsada beeshaas ee ku jira golaha cusub ee degaanka magaaladaas.

Qorshaha masuuliyiinta xukuumaddu daaha dabadiisa ka hagayaan, ayaa u muuqda inuu xuddun u yahay dareennada xasaasiga ah iyo shirarka iska soo horjeeda ee ka socda Berbera, balse lama oga halka natiijad ololahaasi ku soo afjarmi doono.

Sidoo kale, waxa shirarka iyo ololeyaasha liddiga isku ah ee ka socda Berbera ku lammaan hirdan culus oo lagu jiro xilka maayarnimo, kaasoo ay haatan si dag ugu loollamayaan maayarka xilka sii haya Md. Cabdalle Maxamed Carab (Sandheere) oo u muuqda hadda inay sii daciifayso kalsoonidii uu ka haystay xukuumadda dhexe iyo masuuliyiinta Gobolka Saaxil iyo xildhibaan Muuse Daa’uud oo ka mid ah mudanayaasha cusub ee xisbiga UCID uga soo baxay golaha degaanka Berbera.

Waxa kaloo socda xodxodasho lagu kala hororsanayo taageerada xildhibaannada cusub ee golaha degaanka Berbera oo la filayo inay 48-ka saacadood gudahood yeeshaan fadhigooda koowaad oo ay ku dooran doonaan guddoomiye iyo guddoomiye-ku-xigeenka golahooda oo sidoo kalena noqonaya maayarka iyo maayar-ku-xigeenka.

Ilaa hadda ma jirto natiijooyin la shaaciyey oo ka soo baxay shirarka iska soo horjeeda ee ka socda Berbera iyo sida loogu kala awood badan yahay loollannada loogu jiro buuxinta labadaas kursi oo maraya heerkii ugu kululaa, uguna xamaasadda badnaa.

Togdheernews…Berbera

Xildhibaan Cumar Waaye waxa uu xukuumada uga digay in waxa faragalin ah ay ku samayso golayaasha deegaanada ee cusub iyo xubnaha ay u dooranayaan hogaamintooda.

Md Cumar waaye oo Haatuf shalay ugu waramay xaruntooda guurtida, ayaa ugu horayn buuqa ka dhashay doorashada waxa uu yidhi ?Doorashadii golayaasha deegaanada ee dalka ka dhacday casbashooyin badan ayaa ka yimid sidii codbixintu u dhacday, iyadoo natiijada kama dambaysta ahaydna wali laguma dhawaaqin, waxaan bulshada ugu baaqayaa inay nabadgalyada ilaaliyaan, dadkii ku dhintay rabshadihii ka yimid cabashooyinkii doorashadana Ilaahay ha u naxariisto kuwii ku dhaawacmayna Alle ha ka kiciyo.

Waxa kale oo jira xildhibaano iyo wasiiro oo aan xogo badan ka hayo oo qulqulado iyo iska horkeen ka dhex wada magaalo madaxda gobolka Sanaag ee Ceerigaabo, waa arrin cad oo aanu qoraalo ka hayno in wasiiro ay qalalaase iyo fidmo ka wadaan gobolka Sanaag, waxaanu leenahay dalka dan uma ahe in dadweynaha layska horkeenaa, waxaanu leenahay shakhsiyaadka xukuumada ku jira ee gobolka Sanaag beelaha ku dhaqan hagar-daamada iyo iska horkeenka ka dhex wadaa waar waanu idin ognahaye ummada fidmada iyo qoriga dabka leh ee aad ka dhex hurinaysaan ka daaya, golayaasha deegaanada ee gobollada dalka loo doortay xaq bay u leeyihiin inay maayaradooda doortaan waanay u madaxbanaan yihiin ee faragalinta halaga daayo golayaasha deegaanada? Xildhibaanku isaga oo hadalkiisa sii watay waxa uu intaa ku daray ?Shakhsiyaadkaasi wasiirada ah iyo xildhibaanada colaada ka abuuraya Ceerigaabo ee aanu la

hadlaynaa way isgaranayaan, ummaduna way ogtahay, haddii ay xaaladaha iska horkeenka ah joojin waayaan si rasmiya ayaanu ummada ugu soo bandhigi doonaa qoraalada ay ku hurinayaan iska horkeenka bulshada ku dhaqan gobolka Sanaag? .

xigasho/haatuf