Shirkad dhinaca gaasta iyo shidaalka ka shaqaysa oo laga leeyahay dalka Norway ee Qaarada Yurub, lana yidhaah DNO International ASA, ayaa warsaxaafadeed ay soo saartay ku caddaysay inay heshiis dhinaca soo-saarka saliidda ah la saxeexatay dawladda Somaliland, iyadoo xafladdii heshiiskaas lagu saxeexayna ay ka qaybgaleen Madaxweyne Axmed Maxamed Maxamuud (Siilaanyo) iyo guddoomiyaha fulinta ee shirkadda DNO International Mr. Bijan Mossavar-Rahmani, iyagoo weftiga Madaxweynuhu aanay ka hadal heshiishkaas.

Warsaxaafadeedka ka soo baxay shirkadda shidaalka ee laga leeyahay dalka Norway oo shalay lagu baahiyey bogga shirkaddaasi ku leedahay internet-ka, waxa isagoo faahfaahsan uu u qornaa sidan:

“Shirkadda DNO International ee dalka Norway waxay maanta (shalay) ku dhawaaqday inay heshiis dhinaca soo saarka shidaalka ah la saxeexatay dawladda Somaliland, iyadoo shirkadduna ka hawlgeli doonto degaan loo cayimay (Block SL18) oo dhinaca bariga ah.

Madaxweynaha Somaliland Axmed Maxamed Maxamuud (Siilaanyo) iyo guddoomiyaha fulinta shirkadda DNO International Mr. Bijan Mossavar-Rahmani, ayaa ka qaybgalay xaflad loo sameeyey saxeexa heshiiskaas oo shalay (maalintii Isniinta) ka dhacday magaalada Washington,” ayaa lagu yidhi warsaxaafadeedka ka soo baxay shirkadda dhinaca shidaalka iyo gaasta qaabilsan ee Somaliland heshiiska la saxeexatay.

Waxa kaloo warsaxaafadeedka lagu xusay, guddoomiyaha fulinta shirkadda DNO International's Mr. Bijan Mossavar-Rahmani oo arrintan ka hadlay, ayaa sheegay in dhulka Somaliland ee ay ka hawlgeli doonaan dhan yahay 12 kun oo killomitir isku wareeg ah, isagoo xusay in goobtaasi tahay dhul dihin oo aan weli la qodin, isla markaana rajo laga qabo in shidaal laga helo.

Mr. Bijan Mossavar-Rahmani waxa uu tilmaamay in Somaliland lagu daray, kana mid noqotay dalalka ku jira khariidadda shirkaddooda ee dhinaca juquraafi iyo degaannada khayraadka dabiiciga ah leh, isagoo xusay inay ilaa sannadkii 1990 ka shaqaynayeen guud ahaanba mandaqadda Gacanta Cadan, sidoo kalena hawlgallo baadhiseed oo dhinaca shidaalka ka ah ka fuliyeen dalal badan oo adduunka ah, ayna oggolaansho shidaal-baadhis ah ka haystaan dalalka Yemen, Boqortooyada Cummaan, Gobolka Kurdistan ee woqooyiga Ciraaq, Imaaraadka Carabta, Jamhuuriyadda Tuuniisiya iyo Somaliland.

Wasiirka Arrimaha Dibedda Somaliland Dr. Maxamed Cabdillaahi Cumar oo ka mid ah weftiga madaxweynaha iyo Afhayeenka Madaxtooyada Mr. Axmed Saleebaan Dhuxul oo saxaafadda la hadlay toddobaadkan, ayaa sheegay in muddada Madaxweynuhu booqashiisa ku jiro uu kulamo la yeelan doono masuuliyiin ka tirsan dawladda Maraykanka, golaha baarlamaanka USA iyo jaaliyadaha ku dhaqan dalka Maraykanka, isla markaana khudbad ka jeedin doono xarun arrimaha caalamiga ah lagu falanqeeyo oo ku yaal magaalada Washington.

Haseyeeshee, labada masuul ma sheegin in Madaxweyne Siilaanyo ka qaybgelin doono xaflad loo samaynayo heshiish dhinaca shidaalka ah oo Somaliland la saxeexanayso shirkad laga leeyahay dalka Norway, iyadoo arrintuna u muuqato in la doonayey sidii bulshadda looga qarin lahaa heshiiskaas, balse waxa heshiishkaas si rasmi ah u faafisay shirkadda Somaliland heshiishka la saxeexatay.

Dhinaca kale, Wasiirka Macdanta iyo Biyaha Eng. Xuseen Cabdi Ducaale, ayaa markii shirkaddu heshiiskan faafisay kadib caddeeyey inay Somaliland heshiis dhinaca shidaal baadhista ah la gashay shirkadda laga yeelahay dalka Norway ee DNO International.

midnimadii somaliyeed taasna ay Somaliland aanay cidna ka yeelayn balse aanu u safrayno uuun sidii Somaliland ay mar uu u heli lahayd madaxbanaanideeda aniga iyo Weftigan qiimaha badan ee aanu ku wada soconaaba isku mawqif ayanau nahay waana mdi aanu la shirtegayno marwalba meelwabana aanu ka sheegi doono mawqifka JAMHUURIYADA SOMALILAND ay ka taagan tahay gooni isu taageeda iyo madaxbanaanideed.
 

Xubnaha Weftiga ku wehelinaaya Madaxweynaha Safarka
1. Madaxweynaha JSL, Mudane, Axmed Maxamed Maxamuud (Siilaanyo)
2. Marwada Koowaad ee Madaxweynaha JSL, Marwo Aamina Maxamed X. Jirde
3. Wasiirka Arrimaha Dibeda Dr, Maxamed Cabdilaahi Cumar
4. Wasiirka Cadaalada iyo Garsoorka Mudane Xuseen Axmed Caydiid
5. Wasiirka Wasaarada Shaqada iyo Arrimaha Bulshada, Mudane Maxamuud Ahmed Bare (Garaad)
6. Wasiirka Madaxtooyada JSL, Mudane Xirsi Cali Xaaji Xasan
7. Gudoomiye kuxigeenka koowaad ee Baarlamaanka JSL, Mudane Baashe Maxamed Faarax
8. Gudoomiyaha Xisbiga mucaaradka ah ee UCID Eng. Faysal Cali Waraabe

Waxaana halkaasi madaxweynaha ku soo dhaweeyey wasiirka madaxtooyada Jamhuuriyada Somaliland Mudane Xirsi Cali Xaaji Xasan oo madaxweynaha xog waran iyo faahfaahin ka siiyey dhismayaashan iyo waxa loogu talo galayba oo uu wasiirku sheegay in ay yihiin 8 xafiis, laba hool oo shirarka loogu talo galay iyo kulamada caalamiga ah kuwaas oo ah kuwo casri ah, 9 Qol oo hurdo ah oo loogu talo galay ciidamada ilaalada madaxtooyada Jamhuuriyada Somaliland kuwaas oo cusub iyo dib u qurxin balaadhan oo lagu sameeyey fooqa qasrigu ka kooban yahay oo laga dhigay mid AL-MUUNIYAAN lagu xidhay sida ka muuqata sawiradaba.

Ugu danbayn waxa uu wasiirku mahadnaq balaadhan u soo jeediyey cid kasta oo gacan ka geysatay dhismahan

Warbixin – Keyse Axmed Digaale, weriyaha Jamhuuriya ee gobollada bariga Somaliland

Burco (Jam)- Sannad waliba waxa uu leeyahay dhacdooyin lagu xusuusto oo si gaar ah ugu suntan.

Haddaba, weriyaha Jamhuuriya ee gobollada bariga Somaliland Mr. Keyse Axmed Digaale, ayaa warbixin dheer ka diyaariyey dhacdooyinkii ugu muhiimsanaa sannadkii dhammaaday 2012 ee soo maray Gobolka Togdheer.

Warbixintan oo weriyuhu ku soo bandhigay dhacdooyin taariikhaysan oo ah kuwii ugu mudnaa ee soo maray Gobolka Togdheer sannadkii la soo dhaafay ee 2012 waxa uu ku bilaabay sidan:

“15 January 2012: Dagaal culus ayaa degaannada Buhoodle ku dhexmaray ciidanka qaranka Somaliland iyo malleeshiyo-beeleed degaankaas u dhashay, kaas oo sababay sababay khasaare isugu jiray dhimasho iyo dhaawac.

21January 2012: Madaxweynaha Somaliland ayaa Badhasaabka Gobolka Togdheer u magacaabay Mr. Cabdoo Axmed Aayar iyo ku-xigeenkiisa Maxamuud Axmed Yuusuf, kadib markii uu xilalkaas ka kala qaaday Md. Yaasiin Muxumed Cabdi iyo Cabdi Daahir.

22 January 2012: Shacabka ku dhaqan magaalada Burco ayaa isugu soo baxay bannaan ay ku taageerayaan qarannimada Jamhuuriyadda Somaliland.

25 January 2012: Koox dhakhaatiir ah oo u hoggaaminayey Dr Shiine oo ku takhasuusay qalliinnada indhaha, ayaa Cusbitaalka Manhal ee magaalada Burco ka bilaabay hawlgal qalliinno lacag la’aan ah indhaha loogu jeexay 155 qof, in ka badan shan boqol oo kelana loogu sameeyey daawayn iyo baadhitaanno caafimaad.

2 February 2012: Madaxwyne-ku-xigeenka Somaliland Md. Cabdiraxmaan Cabdillaahi Ismaaciil (Saylici), ayaa safar ku tegay Burco oo si weyn loogu soo dhoweeyey, waxaannu booqasho ku tegay Cusbitaalka Guud ee magaaladaas oo lagu daawaynayey askar ka tirsan ciidanka qaranka oo ku dhawacamay dagaallo waqtigaas ka dhacay duleedka degmada Buuhoodle, isagoo askari kastana guddoonsiiyey deeq lacageed.

Waxa kaloo Md. Saylici uu cusbitaalka booqday maxaabiis malleeshiyada Buuhoodle kaga dhaawacmay dagaalladaas.

25 February 2012: Wasiirka Arrimaha Gudaha Somaliland Md. Maxamed Nuur Carraale (Duur) oo ay wehelinayeen xildhibaan Maxamed Xaaji Yuusuf (Waabeeye) iyo masuuliyiin kale oo safar ku tegay Burco, ayaa baabuur casri ah ku wareejiyey taliska ciidanka booliska ee Gobolka Togdheer.

6 March 2012: Xidhiidhiyaha Qaramada Midoobay ee Gargaarka Bani’aadanimo Mr. Mark Bowden iyo wafti uu hogaaminayey ayaa safarkiisii labaad ku tegay magaalada Burco, waxaanay kormeer ku sameeyeen mashaariicda kala duwan ee hay’adaha UN-ku ka fuliyaan halkaas.

8 March 2012: Waxa si weyn looga xusay magaalada Burco munaasibadda maalinta caalamiga ah ee haweenka adduunka.

16 March 2012: Ciidanka Booliska Ismaamulka Soomaalida Itoobiya ee loo yaqaan Liyuu Boolis, ayaa 18 qof dad rayid ah oo u dhashay Somaliland ku laayay degaanka Raqda oo ka tirsan degmada Gaashaamo, halka shacabka magaaladaas oo dilkaas ka gadoodayna ay qudha ka jareen 11 askari oo ka tirsan Liyuu Booliska.

Waxa kaloo ay ciidankaasi maxaabiis ahaan u kaxaysteen dad xoolo-dhaqato ah oo tiradoodu gaadhayso ilaa 28 qof, balse waxa dadkaas lagu sii daayey kadib markii wadahadallo dhacdadaas ku saabsan magaalada Jigjiga ku dhexmareen Suldaan Maxamed Xirsi Qani iyo Madaxweynaha Kililka 5aad ee Itoobiya.

31 March12: Wefti ka socday Baanka Islaamka oo socdaal ku tegay magaalo-madaxda Gobolka Togdheer, ayaa booqday Jaamacadda Burco.

Dr. Dabar Cabdi Macallin oo horkacayey waftigaas ayaa saxaafadda u sheegay in socdaalkooda Burco la xidhiidho qiimayn Baanka Islaamku ku samaynayo jaamacadaha Somaliland, Maamul-goboleedka Puntland iyo Soomaaliya.

1 April 2012: Dagaallo culus ayaa markale degaannada Buuhoodle ku dhexmaray ciidammada qaranka Somaliland iyo malleeshiyooyinka degaankaas.

Dagaalladaas oo keenay dhimasho iyo dhaawac kala duwan waxay ciidammada qaranku ku qabqabteen maxaabiis tiradoodu gaadhayso ilaa 50 xubnood oo ka tirsanaa malleeshiyo-beeleedka reer Buuhoodle iyo baabuur tikniko ah, waxana maxaabiistaas lagu xidhay xabsiga dhexe ee magaalada Burco.

30 April 2012: Masuuliyiinta caafimaadka Gobolka Togdheer ayaa shir-jaraa’id kaga dhawaaqay in cudurka jadeecadu ka dillaacay gudaha iyo degaannada ku xeeran magaalada Burco, maalin kastana cusbitaalka la keeno dad xannuunkaasi soo ritay.

Isuduwaha Wasaaradda Cafimaadka Gobolka Togdheer Dr. Cabdi Yaasiin, ayaa sheegay in dad gaadhaya 300 qof uu ku dhacay cudurka jadeecadaha oo ay u jiifaan cusbitaalka Burco.

Bishii March ee sannadkaas cudurkaasi waxa uu dhawr carruur ku dilay tuulooyin ka tirsan degaannada Gobolka Saraar.

1 May2012: Ciidammada booliska, kuwa sida gaarka ah u tababaran ee SPU-da iyo millateriga, ayaa baajiyey mudaharaadyo ballaadhan oo Burco ka dhigi lahaayeen taageerayasha urur-siyaasadeedkii UDHIS, kaasoo ay kaga soo horjeedeen go’aankii Guddiga Diiwaangalintu ku sheegeen in ururkaasi ka hadhay ka qaybgalka tartanka doorashadii dawladaha hoose ee dalka ka qabsoontay 28 December 2012.

14 May 2012: Wakaaladda Biyaha Burco ayaa soo bandhigtay waxqabadkeeda iyo horumarka dhinaca biyaha ee ay gaadhay.

18 May 2012: Waxa si ballaadhan looga xusay Burco maalinta qarannimada Somaliland. Dadweynaha magaaladaas oo ku lebbisnaa calanka iyo astaanka qarankam ayaa subaxnimadii hore buux-dhaafiyey fagaaraha xarunta maamulka Gobolka Togdheer oo loo asteeyey munasibadda. Sidoo kale, ciidammada booliska, millateriga iyo ardayda dugsiyadam ayaa socod gaaddo-ka-ciyaara ku tegay fagaarahaas oo ay khudbado kala duwan uga jeediyeen Guddoomiyaha Golaha Wakiillada Somaliland Md, Cabdiraxmaan Cirro, xubno ka tirsan wasiirrada xukuumadda, xildhibaanno, maamulka gobolka, madax ka tirsan xisbiga KULMIYE.

21 May 2012: Waxa booqasho ku tegay Burco wefti uu horkacayo Safiir-ku-xigeenka Safaaradda dawladda Japan ku leedahay magaalada Nairobi ee xarunta dalka Kenya.

Safiirka Japan waxa socdaalkiisa ku wehelinayey sarkaalka hay’adda NRC u qaabilsan Somaliland iyo Soomaaliya, masuuliyiin sare oo ka tirsan hay’adda WFP iyo wakiilka xafiiska Somaliland ee hay’adda UNDP.

Safiir-ku-xigeenku waxa uu xadhigga ka jaray 50 guri oo laga hirgaliyey xaafadda Aadan Saleeban oo maalgelintooda bixisay dawladda Japan, fulintiisana iska kaashadeen hay’adda NRC iyo dawladda hoose ee Burco.

28 May 2012: Qorshaha istaraajiyadda waxbarasho ee jaamacadaha Somaliland shanta sanno ee socda oo lagu qabtay xarunta Jaamacadda Burco.

30 June 201: Ardayda fasallada 4aad iyo siddeedaad ee dugsiyada dhexe iyo sare ee Gobolka Togdheer, ayaa u fadhiistay imitixaankii shahaadiga ahaa oo ay guud ahaan ka qaybgaleen 2700 arday.

16 June 2012: Waxa Guddoomiyaha Jaamacadda Burco loo magacaabay Prof. Saleebaan Dirir oo noqday guddoomiyihii afraad ee jaamacaddaasi yeelato tan iyo markii la aasaasay sannadkii 2004.

Bishii July 2012: Waxa magaalada Burco ka furmay shirweyne lagaga hadlay tayaynata garsoorka iyo caddaaladda Somaliland oo ay ka qaybgaleen in ka badan koton xubnood oo isugu jiray guddoomiyayaasha maxakamdaha gobollada, garsoorayaal iyo xafiiska xeer-ilaalinta, kuwaasoo ka kala yimi lixda gobol ee dalka.

Kulankaas waxa furay Guddoomiyaha Maxkamdda Sare ee Somaliland, waxana goob-joog ka ahaa madax ka socday hay’adda UNDP oo maaglisay shirkaas.

4 August 2012: Wasiirka Duulista iyo Hawada Somaliland Md. Maxamuud Xaashi Cabdi oo ay weheliyeen xildhibaanno ka tirsan barlamaanka iyo masuuliyiinta Gobolka Togdheer, ayaa dhagax-dhigay dib-u-dhiska cusub ee ka socda madaarka Burco, iyagoo sidoo kalena lacag gaadhaysa $70 kun oo dollar ku wareejiyey Guddiga Dib-u-dhiska Madaarka.

6 August 2012: Hoggaamiyihii ururka SSC ee ka soo horjeeday Somaliland Dr. Saleebaan Xaglo-toosiya, ayaa lagu soo dhoweeyey magaalada Caynaba, kadib markii uu heshiis nabadeed la qaatay Xukuumadda Somaliland. Waxaana halkaasi ku soo dhaweyey Wasiiradda Daakhiliga, Maaliyadda, Madaxtooyadda iyo Gudoomiyaha xisbiga UCID, kadibna waxa hoggaamiyahaas loo galbiyey dhinaca magaalada Hargaysa, halkaas oo uu kulamo kala duwan kula yeeshay Madaxweynaha Somaliland.

12 August 2012: Wasiirka Dib-u-dejinta Somaliland Dr. Saleeban Xaglo-toosiye oo waqtigaas ahaa hoggaamiyaha jabhaddii SSC, ayaa gaadhay magaalada Burco, kadib markii ka soo kicitimay dhinaca caasimadda Hargeysa, isagoo horkacayey maxaabiis ciidammada qaranku ku qabqabteen dagaallo ka dhacay degaannada Buuhoodle iyo Sool oo lagu sii daayey cafis uu u fidiyey Madaxweyne Siilaanyo.

Dr. Xaglo-toosiye iyo maxaabiista la socday oo u sii jeeday dhinaca magaalada Buuhoodle, waxa sii galbiyey wasiirrada Daakhiliga, Madaxtooyada, Maaliyadda iyo Gaashandhigga Somaliland oo gaadhsiiyey ilaa duleedka degmada Qurilugud, iyadoo weftigaas si ballaadhan loogu soo dhoweeyey magaalooyinka Caynabo iyo Qurilugud.

19 August 2012: Dadweynaha ku dhaqan magaalada Burco ayaa u dareeray tukashada salaaddii Ciiddal-fidriga , kadib markii ay dhammaysteen soonka bisha barakaysan ee Ramadaan.

27August 2012:Dawladda Hoose ee Burco ayaa jidkii saddexaad oo laami ah ka hirgalisay magaaladaas, kaasoo dhererkiisu yahay 1km iyo dheeraad.

27August 2012: Abbaaro 5:00 galabnimo daybalo xooggan iyo siigo aan hore loo arag ayaa ku habsaday magaalada Burco, kuwaasoo sababay inay joogsadaan gebi ahaanba isu socodkii gaadiidka, sidoo kalena albaabada loo xidho goobaha ganacsiga, lana damiyo korontada magaaladaas.

Waxa kaloo dabaylahaasi ay qariyeen iftiinkii fallaadhaha cadceedda, dhulkuna wuxuu isu beddelay mugdi, iyaga oo shacabka reer Burco-na mar wada bilaabay duco Alle-bari, kadib markii cabsi iyo baqdin weyn ay soo foodsaartay. Haseyeeshee, 45 daqiiqo dabeed ayey go’day dabayshaas, waxana magaalada ka bilaabmay roob culus oo waqti kooban socday, waxaanay markii ugu horreysay taariikhda ee dabaylo noocaas oo kale ah hadheeyaan magaalada Burco.

28 August 2012: Madaxweyne-ku-xigeenka Somaliland Md. Cabdiraxmaan Cabdillaahi Ismaaciil (Saylici) oo ay weheliyaan wasiirrada Waxbarashada, Madaxtoyada, Ciyaaraha, xildhibaanno iyo masuuliyiin kale, ayaa ka qaybgalay xaflad loo sameeyey qallin-jabinta dufcaddii 2aad oo ka kooban 90 arday oo dhammaystay waxbarashada kulliyadaha kala duwan ee Jaamacadda Burco.

12 September 2012: Waxa magaalada Burco waxa lagaga dhawaaqay guddi ay ku midoobeen ganacsatad Gobolka Togdheer oo ka kooban 21 xubnood, kuwaasoo loo xilsaaray horumarinta iyo kobcinta ganacsatada Burco.

Isla dabayaaqadii bishii September ganacsatada Gobolka Togdheer ayaa kulan ballaadhan la yeeshay wefti ka socday Baanka Adduunka oo dalka ka waday qorshe kor loogu qaadayo laguna, kobcinayo ganacsiga gobolka, tallaabadaas oo baayacmushtarkuna si weyn u soo dhoweeyeen.

2 October 2012: Badhasabka Gobolka Togdheer Mr. Cabdoo Axmed Aayir, ayaa ka warbixiyey baaxadda khasaare ka dhashay roobab laxaad leh oo ka da’ay degaanno ka mid ah gobolka, waxaannu sheegay in roobabkaasi dileen xoolo gaadhaya dhawr kun oo neef, isla markaana baabiyen dhismayaal iyo guryo kala duwan, isagoo xusay in hal qof dumar ah ku dhimatay kadib markii daad qaaday.

7 October2012: Sayladda lagu kala iibsado xoolaha nool ee magaalada Burco waxa ka bilaabmay dhaqdhaqaaq xooggan oo ka dhashay mooshinkii Xajka oo xoolo aad u tiro badan loo diray dalka Sucuudi Carabiya.

Sayladda xoolaha ee Burco ayaa noqotay xilligaas mid xaami ah oo maalin kasta lagu kala iibsado xoolo nool oo tiradoodu gaadhayso siddeed kun oo neef adhi ah, iyadoo neefka la kala siisanayey lacag dhan $80 dollar, waxana iibka xoolaha ugu badnaa labada shirkadood ee Al-jaabiri iyo Indhadeero. Sidoo kale, gaadiid iyo dadweyne tiro badan ayaa shaqooyin ka helay.

26 October 2012: Waxay ku beegnayd munaasibaddii Ciidda Carrafo, waxana dadweynaha reer Burco tukashadii salaadda Ciiddal-adaxdaha kala qaybgalay Wasiirka Madaxtooyada iyo masuuliyiin kale oo ka tirsan xukuumadda.

29 October 2012: Tartankii ololaha doorashooyinka dawladaha hoose ayaa ka bilaabay degaannada Gobolka Togdheer, waxaanay toddobadii urur ee ka qaybgalay doorashada midkoodba maalin cududdiisa ku soo bandhigay fagaarayaasha muddo bil ah oo ololuhu socday.

10 November 2012: Wefti uu hoggaaminayey Madaxweyanaha Somaliland Md. Axmed Maxamed Maxamuud (Siilaanyo) ayaa socdaal ku tegay magaalada Burco e xarunta Gobolka Togdheer.

Md. Axmed-Siilaanyo waxa uu xadhigga ka jaray qaybo ka mid ah dugsigii hore ee Farsamada Gacanta ee Burco oo ay dib-u-dhis ku samaysay hay’adda UNDP. Sidoo kale, wuxuu furay jid laami ah, halka uu saddex kalena dhagax-dhigay, kuwaas oo ay dhammaantood hirgalinayso dawladda hoose ee Burco.

Waxa kaloo Madaxweynaha Siilaanyo uu dhagax-dhigay dhismayaal cusub oo lagu kordhinayo Qaybta Booliska Gobolka Togdheer iyo guriga martida ee Burco, halka uu furay qayb ka mid ah gurigaas oo dayactir lagu sameeyey.

Madaxweynaha iyo weftigiisa oo habeennimadii u hoyday Burco waxay subaxdii xigtay kormeer ku soo mareen garoonka diyaaraha oo ay ilaa hadda ka socoto hawl dib-u-dhis ah, xarunta caafimaadka iyo tayaynta xoolaha iyo Cusbitaalka Guud ee magaaladaas iyo weliba dhismaha jid laami ah oo isku xidhi doona Burco, Oodweyne iyo Hargaysa.

Sidoo kale, waxa uu isla maalintaas Madaxweynaha Somaliland furay dhismayaal cusub oo lagu kordhiyey dugsiyada sare ee Sheekh Bashiir iyo Sheekh Ibraahim ee magaalada Burco.

Madaxweyne Siilaanyo oo ay safarkiisa Burco ku wehelinayeen raxan ka tirsan golihiisa wasiirrada, waxa ay gelinkii dambe ee isla maalintaas dib ugu laabteen dhinaca caasimadda Hargeysa.

28 November 2012: Dadweynaha reer Burco iyo guud ahaan shacabka Somaliland ayaa u dareeray codbixintii doorashada dawladaha hoose ee dalka ka qabsoontay.

Golaha degaanka degmada Burco waxa ku tartamay 147 murrashax oo kala metelayey 7dii urur-siyaasadeed ee doorashada ka qaybgalay, waxaanay codbixintaasi waqtigii loogu talogalay ku dhammaatay si nabadgelyo ah.

5 December 2012: Komishanka Doorashooyinka ee Gobolka Togdheer, ayaa si rasmi ah ugu dhawaaqay natiijada codbixintii doorashada golaha degaanka ee Burco iyo magacyada 21-ka xildhibaan ee ku guulaystay.

11 December 2012: Maxkamadda Gobolka Togdheer waxay dhaarisay 21-ka xildhibaan ee loo doortay golaha degaanka Burco.

15 December 2012: Golaha cusub ee degaanka Burco ayaa yeeshay fadhigoodii ugu horreeyey oo ay xilka maayarnimo ugu doorteen Md. Maxamed Yuusuf Muraad, ku-xigeenkiisana Md. Muxumed Xasan Xoday.

19 December.2012: Wasiirka Xannaanada Xoolaha Somaliland Dr. Cabdi Aw Daahir, ayaa xadhigga ka jaray xarunta caafimadka iyo tayaynta xoolaha oo ku taal duleedka magaalada Burco.

Xafladdii furitaanka xaruntaas waxa joogay Wasiirka Ganacsiga, Wasiiru-dawlaha Maaliyadda, xildhibaanno, madaxda degmada Burco iyo marti-sharaf kale oo tiro badan.

Masuuliyiinta xarunta caafimaadka iyo tayeynta xoolaha nool oo munaasibaddaas ka hadlay, ayaa sheegay in xaruntoodu leedahay shaybadh casri ah, qaadkeeduna dhan yahay in ka badan 240 kun neef oo isugu jira geel, lo’ iyo adhi, waxana fursado shaqo ka helay in ka badan 2000 qof.

20 December 2012: Maayirka cusub ee la doortay degmada Burco ayaa si rasmi ah xilka ugala wareegay maayirkii hore oo ku wareejiyey lacag  gaadhaysa ilaa toddobada boqol oo milyan shillinka Somaliland ah, iyadoo sidoo kalena munaasibaddaas lagu soo bandhigay waxqabadka maayirkii hore muddadii uu xilka hayey.

Xil-wareejintaas waxa ka qaybgalay masuuliyiin ka kala socday xukuumadda, maamulka Gobolka Togdheer iyo dadweynenaha Burco.

Warbixin – Keyse Axmed Digaale

Madaxweyne Siilaanyo ayaa soo saaray shalay digreeto uu ku dhaqan-gelinayo Xeerka Sirdoonka oo ay Madaxtooyada Somaliland iyo guddi ka tirsan warbaahinta maxalliga ah u ballansanaayeen in meel laysla dhigo cabashooyinka ku saabsan qodobo xeerka ku jira oo aad looga qayliyey ka hor inta aannu Madaxweynuhu qallinka ku duugin dhaqan-galkiisa.

Warsaxaafadeed uu soo saaray Afhayeenka Madaxtooyada Somaliland Mr. Axmed Saleebaan Dhuxul oo lagu shaaciyey digreetada Madaxweynuhu dhaqan-geliyey xeerka Madaxtooyadu ku wacad-furtay ballantii u taallay guddiga saxaafadda xorta ah waxa uu u qornaa sidan:

“Madaxweynaha Jamhuuriyadda Somaliland Mudane Axmed Maxamed Maxamuud (Siilaanyo) waxa uu maanta [shalay] digreeto madaxweyne ku dhaqan-geliyey Xeerka Hay’adda Sirdoonka Qaranka Xeer Lr. 59/2012.

Madaxweynuhu:-

Markuu arkay: Qodobka 90aad ee Dastuurka Jamhuuriyadda Somaliland;

Markuu arkay: Qodobka 75aad ee Dastuurka Jamhuuriyadda Somaliland;

Markuu arkay: Go’aanka Golaha Wakiillada JSL; Go’aan Lr. GW/G/KF-19/581/2012 ee ku taariikhaysan 27/12/2012 ee ay ku ansixiyeen Xeerka Hay’adda Sirdoonka Qaranka Xeer Lr. 59/2012;

Wuxuu soo saaray dhaqan-galka Xeerka Hay’adda Sirdoonka Qaranka Xeer Lr. 59/2012 ee Jamhuuriyadda Somaliland.”

Haseyeeshee, go’aanka Madaxweynuhu ku saxeexay Xeerka Sirdoonka ayaa noqonaya in Madaxtooyadu ku wacad-furtay wadahadal loo ballansanaa inay kala yeelato warbaahinta dalka cabashada xeerkaasi oo qodobbo ka mid ah cabudhin iyo dhibaato ku noqonayaan shaqada hayaan iyo guud ahaan mabaadi’da xorriyatul-qawlka dastuurka Somaliland dammaanad-qaaday.

Dadaallo ay ku jireen guddi ka kooban sagaal xubnood oo matalayey ururka SOLJA iyo hay’adaha warbaahinta madaxbannaan oo doonayey inay cabashooda u bandhigaan Madaxweynaha, kana codsadaan in aannu u saxeexin ilaa wax-ka-beddel lagu sameeyo, ayaa hakad kaga yimi hawlihii doorashada dartood uu Wasiirka Madaxtooyada Mr. Xirsi Cali Xasan oo la kulmay kula ballamay inay arrintan Madaxweynaha kala hadli doonaan kadib natiijada doorashada, isagoo u ballanqaaday in aan muddadaas Madaxweynuhu saxeexi doonin xeerkan. Hase ahaatee, iyadoo aannu qabsoomin kulankii loo ballansanaa ayaa si lama filaan ah shalay u soo baxday digreetada Madaxweyne Siilaanyo ku dhaqan-gelinayo Xeerka Sirdoonka ee muranka dhaliyey.

Sidoo kale, waxa Madaxweynaha Jamhuuriyadda Somaliland Md. Axmed Maxamed Maxamuud (Siilaanyo) uu dhaqan-geliyey wax-ka-beddel iyo kaabis lagu sameeyey Xeerka Guddida Mihnadlayaasha Caafimaadka.

“Madaxweynaha Jamhuuriyadda Somaliland Mudane Axmed Maxamed Maxamuud (Siilaanyo), waxa uu maanta [shalay] digreeto madaxweyne ku dhaqan-geliyey wax-ka-beddelka iyo kaabista Xeerka Guddiga Mihnadlayaasha Caafimaadka.

Madaxweynuhu:

Markuu arkay: Qodobka 90aad ee Dastuurka Jamhuuriyadda Somaliland;

Markuu arkay: Qodobka 75aad ee Dastuurka Jamhuuriyadda Somaliland;

Markuu arkay: Go’aanka Golaha Wakiillada JSL; Go’aan Lr. GW/G/KF-19/582/2012 ee ku taariikhaysan 27/12/2012 ee ay ku ansixiyeen wax-ka-beddelka iyo kaabista Xeerka Guddiga Mihnadlayaasha Caafimaadka Xeer Lr. 19/2001;

Wuxuu soo saaray dhaqan-galka wax-ka-beddelka iyo kaabista Xeerka Guddiga Mihnadlayaasha Caafimaadka Xeer Lr. 19/2001 ee Jamhuuriyadda Somaliland,” ayaa lagu yidhi warsaxaafadeed kale oo ka soo baxay Madaxtooyada Somaliland.

War-saxaafadeed

Madaxweynaha Jamhuuriyada Somaliland Mudane Axmed Maxamed Maxamuud (Siilaanyo), waxa uu maanta digreeto madaxweyne ku  Dhaqan-geliyey  Xeerka Hay’adda Sirdoonka Qaranka Xeer Lr. 59/2012.

Madaxweynuhu:-

Markuu Arkay:         Qodobka 90aad ee Dastuurka Jamhuuriyadda Somaliland;

Markuu Arkay:         Qodobka 75aad ee Dastuurka Jamhuuriyadda Somaliland;

Markuu Arkay:         Go’aanka Golaha Wakiilada JSL, Go’aan Lr. GW/G/KF-19/581/2012 ee ku taariikhaysan 27/12/2012 ee ay ku ansixiyeen Xeerka Hay’adda Sirdoonka Qaranka Xeer Lr. 59/2012;

Wuxuu Soo Saaray

Dhaqan-galka Xeerka Hay’adda Sirdoonka Qaranka Xeer Lr. 59/2012 ee Jamhuuriyadda Somaliland.

ALLAA MAHAD LEH

Axmed Saleebaan Maxamed (Dhuxul)

    Af-hayeenka Madaxtooyada JSL.

Geesta Kale

Madaxweynaha Jamhuuriyada Somaliland Mudane Axmed Maxamed Maxamuud (Siilaanyo), waxa uu maanta digreeto madaxweyne ku  Dhaqan-geliyey  Wax Ka-beddelka iyo Kaabista Xeerka Guddiga Mih-nadlayaasha Caafimaadka.

Madaxweynuhu:-

Markuu Arkay:         Qodobka 90aad ee Dastuurka Jamhuuriyadda Somaliland;

Markuu Arkay:         Qodobka 75aad ee Dastuurka Jamhuuriyadda Somaliland;

Markuu Arkay:         Go’aanka Golaha Wakiilada JSL, Go’aan Lr. GW/G/KF-19/582/2012 ee ku taariikhaysan 27/12/2012 ee ay ku ansixiyeen Wax Ka-beddelka iyo Kaabista Xeerka Guddiga Mihnadlayaasha Caafimaadka Xeer Lr. 19/2001;

Wuxuu Soo Saaray

Dhaqan-galka Wax Ka-beddelka iyo Kaabista Xeerka Guddiga Mihnadlayaasha Caafimaadka Xeer Lr. 19/2001 ee Jamhuuriyadda Somaliland.

ALLAA MAHAD LEH

Axmed Saleebaan Maxamed (Dhuxul)

    Af-hayeenka Madaxtooyada JSL.

Madaxweynaha Soomaaliya Xasan Sh. Maxamuud ayaa beesha Caalamka ka codsaday in ay Somaliland iyo Maamul-goboleedka Puntland cadaadis ku saaraan inay hoos yimaadaan Dawladda Soomaaliya, isaga oo sheegay in midnimada Soomaaliya ay muqadas tahay oo aanay ogolayn cid gooni u goosata. Madaxweynaha  ayaa carrabka ku adkeeyay inay Somaliland iyo maamulka Puntland u hayaan

 ixtiraam badan, balse ay u arkaan inay yihiin maamulo ka mid  ah dawlada Somalia, isagoo yidhi, "maaha in gobol walba uu sheegto goosasho been ah iyo wax aanu ahayn oo samaysto lacag iyo baasaboor foojari ah" wuxuuna sheegay inay taasi sii abuurayso inay xiisada Somalia ee hogaamiyayaasha deegaanada kasii darto. sidaa awgeed waxa uu ku dooday in aanay Somaliland iyo Puntland joojinayn wuxuu ugu yeedhay been-beenta ay iska dhigayaan wax aanay ahayn ee ay kula xidhiidhayaan heshiisyada been-beenta ah, isla markaana   xukuumaddiisu kala xidhiidhay   qaramada midoobay, Ururka Midawga Afrika, Urur Goboleedka IGAD iyo midawga Yurub, maxkamadda caalamiga ah ee denbiyada dagaalka iyo dhamaan Ururada siyaasada ee ka wer-wersan xaalada inay noo saamaxaan inaanu xidhno dhamaan  xuduudaha siyaasada Somalia ee

denbiilayaasha iyo dagaal oogayaasha si aynu daacad uga noqono denbiyada ka dhanka ah bini'aadanimada intii lagu jiray dagaalada sokooye ee Somalia. ayuu yidhi Madaxweynaha cusub ee Somalia Xasan Sheekh Maxamuud oo todbaadkan la hadlayay wakiilo iyo dublamaasiyiin ka socda beesha caalamka oo uu ku qaabilay xafiiskiisa. "waxaanu si cad ugu baaqaynaa hogaamiyayaasha Somaliland iyo  Puntland

maamuladaasi inay aqbalaan oo u hogaansamaan dastuurka federaalka ee Somalia, sababtoo ah Somalia waxay leedahay 275 xubood oo ah baarlamaan la  dooratay oo dhamaan deegaamada ka wakiil ah. sidaa awgeed waxay taasi soo af-jartay been-beentii goosashada iyo lacagihii iyo baasabooradii foojariga ahaa " ayuu yidhi Xasan Sheekh Maxamuud oo la hadlayay wefdiga ka socday beesha caalamka.  Dhawaaqa hanjabaada iyo xaqiraada ah ee kasoo baxay madaxweynaha cusub ee Somalia ayaa waxba kama jiraan ka dhigaya weedho dublamaasiyadeed iyo hadalo afmacaani ah  oo uu hore ugaga  hadlay qorshihiisa siyaasadeed ee ku

waajahan Somaliland oo uu sheegay inuu sii wadayo wada hadaladii beesha caalamku hormoodka u ahayd ee u socday Somaliland dawladii hore ee Somalia oo uu sheegay inuu halkii kasii wadayo, balse dhawaaqan danbe oo ahaa mid aan saxaafada loogu talo gelin ayaa si dhab ah u kashifaya qorshihiisa siyaasadeed ee u qarsoon, isagoo weedhahani ahaayeen fariin si dhab ah uu ugu dhiibayay   beesha caalamka, taas oo

xaqiraad iyo meel ka dhac ah ku ah qadiyada madaxbanaanida iyo qaranimada Somaliland, isla markaana si cad u muujinay khatar kusoo fool leh Somaliland, balse aanay dareensanayn xukuumadda Somaliland marka laga reebo kooxda hanbalyada ku boobtay markii la doortay Madaxweynaha cusub ee Somalia Xasan Sheekh Maxamuud, isagoo aan weli cadayn mawqifkiisa siyaaasadeed ee ku aadan Somaliland, balse la

rumaysanyahay inay ka hanbalyadoodu ahayd xidhiidho iyo dano gaara oo ka dhexeeya oo aan ka turjumayn qadiyada Somaliland.

Xigasho Hubaal

Hargeysa (Togdhnews)- Murrashaxii jagada madaxweynaha xisbiga mucaaridka ah ee UDUB Md. Cali Maxamed Warancadde iyo masuuliyiin kale oo uu ka mid yahay wasiirkii hore ee Maaliyadda Mr. Xuseen Cali Ducaale (Cawil), ayaa la sheegay inay ku biirayaan urur-siyaasadeedka WADDANI.

Sida ilo-wareedyo kala duwan Jamhuuriya u xaqiijiyeen xalay, isla markaana lagu baahiyey qaar ka mid ah shabakadaha wararka, Cali Maxamed Warancadde oo shirkii golaha dhexe ee xisbiga UDUB dhowaan ku yeeshay hudheelka Ambassador ee loogu doortay inuu noqdo murrashaxooda madaxweynaha iyo xubno kale oo miisaan culus, ayaa la sheegay inay wadahadallo la leeyihiin madaxda urur-siyaasadeedka WADDANI, iyadoo la rajaynayo in wadahadalkaas ay ka soo baxdo natiijo la xidhiidha sidii Warancadde iyo xubno kale oo UDUB ah ugu biiri lahaayeen WADDANI.

Mr. Cali Maxamed Warancadde iyo wasiirkii hore ee maaliyadda Mr. Cawil Cali Ducaale oo aannu xidhiidho kala duwan la samaynay in arrintan wax looga weydiiyo ayey suurtogal noqon wayday in aannu helno, iyadoo masuul sare oo ka tirsan urur-siyaasadeedka WADDANI oo Jamhuuriya khadka telefoonka ku helayna uu ka gaabsaday inuu wax faahfaahin ah ka bixiyo wadahadalka u bilowday Warancadde iyo WADDANI.

Warku waxa uu intaa ku daray in xubnaha ku biiraya WADDANI uu ka mid yahay guddoomiyihii hore ee Baanka Somaliland Mr. Cabdiraxmaan Ducaale, maalmaha soo socdana siyaasiyiintaas loo qaban doono xaflad ay ku shaacinayaan ku biiristooda ururkaas.

Waxa jira qorshe la wado oo lagu doonayo sidii murrashaxiinta madaxweynenimo ee ka soo jeeda beelaha galbeedka Burco fikradahooga loo midayn lahaa, meelna laysugu keeni lahaa, iyadoo shir arrintaas lagu gorfeeyeyna shalay ka qabsoomay hudheel ku yaal bariga caasimadda Hargeysa, kaasoo la sheegay inay ka qaybgaleen Guddoomiyaha urur-siyaasadeedka WADDANI, ahna Guddoomiyaha Golaha Wakiillada Md. Cabdiraxmaan Maxamed Cabdillaahi (Cirro) iyo murrashaxa jagada madaxweynaha ee xisbiga UDUB Mr. Cali Maxamed Warancadde, waxana shirkaas ka manqaa guddoomiyaha urur-siyaasadeedka UMMADDA Dr. Maxamed Cabdi Gabboose.

Haddii ay dhab noqoto in Cali Maxamed Warancadde ku biro urur-siyaasadeedka WADDANI waxa ay dhabar-jab xooggan ku noqonaysaa xisbiga UDUB ee ka dhigtay murrashaxa madaxweynenaha.

Xigasho Wargayska Jamhuuriya

Madaxweynaha Jamhuuriyadda Somaliland, Mudane, Axmed Maxamed Maxamuud (Siilaanyo) waxa uu Digreeto madaxweyne No: JSL/M/XERM/2491283/082012 Xilal kala duwan ugu magacaabay wasiirka Wasaarada warfaafinta iyo wacyigelinta, wasiirku xigeenka Wasaarada warfaafinta iyo wacyigelinta  JSL, Gudoomiyaha Gobolka Gabiley,   Afhayeenka Madaxtooyada JSL, iyo Maareeyaha Telefishanka Qaranka ee madaxa banaan.

Madaxweynuhu:-

 Markuu Arkay:                     Qodobka 90aad, faqradiisa (2)aad ee                                                                       Dastuurka Jamhuuriyadda Somaliland,

Markuu Tixgeliyey:            Ahmiyadda wayn ee ay  Wasaaradu u                                                                       leedahay Dalka iyo Dhismaha Qaranka,

Markuu Arkay:                    In baahi loo qabo buuxinta jagadan hoos ku                                                          xusan,

Markuu Ka Fiirsaday:        Kartidiisa, aqoontiisa iyo hufnaantiisa shaqo,

Markuu ku Qancay:           In uu hanan karo xilka loo magacaabay,

Wuxuu go’aansaday 

1. In Mudane, Abiib Diiriye Nuur, laga bilaabo taariikhda maanta uu ahaado Wasiirka Wasaaradda Warfaafinta iyo Wacyigelinta ee JSL.

2. In Mudane, Cabdilaahi Maxamed Daahir (Cukuse), laga bilaabo taariikhda maanta uu ahaado Wasiir Ku-xigeenka Wasaaradda Warfaafinta iyo Wacyigalinta ee JSL.

3. In Mudane, Axmed Saleebaan Dhuxul, laga bilaabo taariikhda maanta uu ahaado Afhayeenka Madaxtooyada Jamhuuriyadda Somaliland.

4. In Mudane, Axmed Cali Nuur, laga bilaabo taariikhda maanta uu ahaado Gudoomiyaha Gobolka Gabiley ee Jamhuuriyadda Somaliland.

5. In Mudane, Khadar Cali Gaas, laga bilaabo taariikhda maanta uu ahaado Maareeyaha Telefishanka Qaranka madaxa bannaan ee Qaranka Somaliland.

ALLAA MAHAD LEH

                     Naasir Yuusuf Daahir (Nasir Naska)
Xog-hayaha Gaarka ah ee Xafiiska Af-hayeenka Madaxtooyada JSL.