Hargeysa(Togdheernews):- Madaxweynaha talada dalka Somaliland maanta wareejiyey Md. Daahir Rayaale Kaahin,

 ayaa khudbaddiisii ugu dambaysay oo uu maanta ka jeediyey Munaasibad lagu qabtay qasriga Madaxtooyada ku sheegay inay maanta tahay maalin taariikhi ah oo ay ummadda reer Somaliland jid dheer u samareen, isla markaana waxa uu intaa ku daray inuu isagu ku faanayo hirgelinta hannaanka dimuquraaddiyadeed ee uu dalka ka hirgeliyey. Waxaanu bulshada ugu baaqay inay la shaqeeyaan Madaxweynaha la doortay Md. Siilaanyo oo xilka maanta la wareegay.

Daahir Rayaale Kaahin, waxa khudbad aan dheerayn oo uu maanta ka jeediyey Xafladdii uu xilka kagala wareegay Madaxweynaha la doortay Axmed-Siilaanyo, oo lagu qabtay xarunta Madaxtooyada ee magaalada Hargeysa oo Masuuliyiin dibad iyo gudaba isaga yimi ka soo qaybgaleen. “Maanta waxaan leeyahay waa maalin qiimo weyn u leh shacbigaummadda reer Somaliland waa taariikh taabbo gal noqotay oo hirgashay geeddigii aannu soo wadnay muddada dheer,” ayuu yidhi Md. Rayaale.

Madaxweynaha shaqada ka tagay maanta Daahir Rayaale oo hadalkiisa sii wataa waxa uu yidhi; “Waxaan halkan hambalyo uga gudbinayaa ummadda reer Somaliland meel kasta oo ay dibad iyo gudaba joogaan, waxa kale oo aan halkan mahad uga jeedinayaa wufuudda dalalka aannu wallaalaha nahay ee Jabuuti, Itoobiya iyo Kenya ee xafladdan nagala soo qaybgashay. Waxa kale oo aan halkan ku soo dhawaynayaa walaalkay Axmed Maxamed Maxamuud oo ku guulaystay doorashadii Madaxtinimo ee aannu u tartamaynay.”

Daahir Rayaale waxa uu ballan-qaaday inuu si niyadsami ah ula shaqayn doono Madaxweynaha xilka kala wareegay. Waxaana ka mid ahaa hadalladiisii oo uu yidhi; “Waxaan si nayad-sami ah oo kalsooni leh oo farxad leh ayaan xilka u wareejinayaa. Siddeed sano ayaan xilka soo hayay sannad ku meel-gaadh ah iyo toddoba kale, waan garan karayaa culayska uu xilkani leeyahay iyo dhibaatada hoostaalla Madaxweynaha maanta I beddalaya oo hawsha uu igala wareegayo aniga ayaa xogogaal u ah, waxaan halkan ka ballan-qaadayaa anigu waan is dabataagayaa gacanna waan ku siinayaa,. Shacabiga reer Somaliland waxaan leeyahay xilkiisa haddaynu Madaxweynaha la garab-qabanno ayuumbuu ka soo baxayaa haddii kale wuu yaraanayaa wuxuu qabanayaa, aan u midawno inaynu is daba-taagno”

Madaxweynaha talada Somaliland siddeedii sano ee u dambeeyey hayay Md. Rayaale, waxa sheegay inuu dhammaaday tartankii Xisbiyadu, isla markaana loo baahan yahay in gacmaha la is qabsado oo qarannimada laga wada shaqeeyo. “Wuu dhammaaday tartankii Axsaabtu guul buu ku dhammaaday, wax ka hadhay ma jiro. Inaynu dalkeenna u shaqaynu ayaynu maanta u wada taagannahay oo dhammaanteen gacmaha is wada qabsanno oo aynu meel uga soo wadajeesanno oo aan taabbo-galinno qarannimadeennan curdinka ah ee muddada aannu soo wadnay. Illaahay mahaddii maanta anigu waxaan ku faanayaa dimquraadiyadda aan hirgeliyey ee uu hindisaheeda lahaa Madaxweynihii iga horreeyey Allah ha u naxariisto’e Marxuum Maxamed Xaaji Ibraahin Cigaal.”

Sidoo kale, Madaxweynaha la doortay ee maanta talada la wareegay Axmed Maxamed Maxamuud (Siilaanyo), ayaa hadal uu halkaa ka jeediyey ugu horreyn u mahadceliyey Madaxweynaha Jabuuti, Ra’isal-Wasaaraha Itoobiya, Madaxweynaha Kenya iyo Wufuudda saddexdaasi dal u soo direen ka qaybgalka Munaasibadda uu maanta xilka kula wareegay, dawladaha Maraykanka, Ingiriiska, Faransiiska iyo dalalka kale ee reer Yurub iyo dhinacyo kale.

Madaxweyne Siilaanyo waxa ka mid ahaa hadalladiisii oo uu yidhi; “Waxaan mahad u calinayaa Weftiga reer Jabuuti ee uu hoggaaminayo Wasiirka Warfaafinta, dhaqanka iyo isgaadhsiinta, Waxaan Mahad u celinayaa Weftiga reer Itoobiya ee uu hoggaaminayo Wasiirka dhaqanka iyo dalxiiska iyo Madaxweynaha ismaamulka Soomaalida, waxaan mahad u celinayaa Weftiga reer Kenya ee uu hoggaaminayo Guddoomiye ku-xigeenka Faarax Macallin, waxaan mahad u celinayaa Madaxweynaha Jabuuti Ismaaciil Cumar Geelle iyo Ra’isal Wasaaraha Itoobiya oo hambalyooyin ii soo diray markii la I doortay.”

Waxaanu intaasi ku daray; “Waxaan mahad u celinayaa Caalamka doorkii muhiimka ahaa ee ay ka qaateen diiwaangelinta iyo doorashada, waxaan mahad u celinayaa, caam ahaan shacabka Somaliland, culima-awdiinka, qurba-joogga, Xisbiyada qaranka, Golayaasha Qaranka, Saxaafadda iyo Madax-dhaqmeedka.”

“Illaahay waxaan ka baryayaa inuu ii fududeeyo Walaalayaal xilka maanta ummaddu ii igmatay waa xil wayn oo aad u wayn Illaahay waxaan ka baryayaa inuu ii fududeeyo inaan ummadda sida ay igu doorteen oo sidaan hore u ballan qaaday barnaamijkayagana ku caddeeyey u noqdo nin u dedaala oo noqdo shacbiga Somaliland qof u siman dhaqaalayn iyo caddaalad inaan ku dhaqo ayaan ballan qaadayaa.” Sidaa ayuu yidhi Madaxweynaha la doortay ee Somaliland Md. Axmed-Siilaanyo, oo maanta si rasmiya ula wareegay xilkii Madaxweynenimo oo isla saaka loo dhaariyey.

Togdheernews.com

Hargeysa/Somaliland.