Go`aankan ayuu sheegay in uu yimid kadib markii maanta madaxda Midowga Afrika uu uga furmay shirkoodii 15-aad magaalada Kampala ee caasimada dalka Uganda.

"Guinea diyaar ayay u tahay in ay deg-deg koox ciidan ah ugu dirto Soomaaliya, waxaana dooneynaa in aan sida ugu dhaqsiyaha badan u buuxino tiradii sideeda kun ee aan horay u qoondeynay" ayuu yiri Mr. Jean Ping.

Waxa uu sheegay in ay talaabtan xigi doonto mid iyana lagu kordhinayo ciidamada Amisom ee Somaliya kuwaasoo tiradooda la gaarsiinayo toban kun oo askari.

In ka badan 6000 oo ciidanka Amisom ah ayaa iminka ku sugan magaalada Muqdisho, waxaana shaqadoodu tahay in ay difaacaan xarumaha iyo madaxda dowladda.

Talaabadan lagu kordhinayo ciidamada AMISOM ayaa imaanaya xilli kooxda ka dagaalanta koonfurta Soomaaliya ee Al-Shabaab weeraro argagixiso la beegsatay caasimadda Uganda ee Kampala, halkaasoo ay ku dileen 76-ruux oo daanayay ciyaarta finalka ee Koobka Aduunka, kuna dhaaweceen 80 kale.

Weeraradan argagixiso ayay kooxda Al-Shabaab sheegtay in ay uga aargudaneysay dowladda Uganda, waxeyna ugu baaqeen in ay kala baxdo ciidamadeeda magaalada Muqdisho.