Wasiirka Daakhiliga Somaliland Cabdullaahi Ismaaciil Cali (Cirro) oo isagoo ku sugan magaalada Laascaanood shalay u waramay idaacadda dawladda ee Raadyow Hargeysa, waxa uu sheegay inay kulan la yeesheen baadhayaal CID-da ka tirsan oo gacanta ku haya kiiskaas. “Sida aad la socotaan

hawlo kormeer ayaanu u joognaa magaalada Laascaanood, waxaanay hawlahaasi noogu socdaan si wanaagsan, dadweynuhuna iyagoo ka xun wixi dhacay ayay raabo-raabo noola kulmayaan. Markaa maanta (shalay), waxaanu  kulan la yeelanay odayaal iyo urur ka mid ah ururada haweenka, waxaanan wada yeelanay xog-waraysi, isla markaana waxaanu isla garanay in nabadgalyada dhinac looga soo wada jeesto,” ayuu yidhi Wasiirku. “Hawshada waxa garab socday arrimihii baadhista oo waxaanu la kulanay qolyihii kiiska gacanta ku hayay ee CID-da. Markaa hawlahaasi si fiican ayay noogu socdaan, Ilaahay ayaan ka rejaynayaa inay si fiican noogu dhammaadaan,” ayuu raaciyay.

Wasiiru-dawlaha Waxbarashada Somaliland Maxamuud Garaad (Qaw) oo ka mid ah weftiga Xukuumadda ee ku sugan Laascaanood oo isna u waramay Raadyow Hargeysa, waxa uu faahfaahin ka bixiyay hawlaha ay gobolkaas u joogaan. “Hawshani waxa ay la xidhiidhay xogogaal-u-noqoshada iyo u kuurgalka haya’addaha dawladda iyo dhismayaasha wixii waxqabad u baahan, markaa maanta (shalay), kormerkaas ayay hawshu ahayd,” ayuu yidhi Wasiiru-dawluhu.